英格蘭輸波出局，無緣二○○八年歐洲國家盃之後，唔少球迷認為英格蘭球隊內「球星」如雲，身價甚高，好多位都係週薪十萬鎊或以上嘅人物，但佢哋踢起上嚟，完全冇「為國捐軀」嘅氣魄，同蘇格蘭勇戰意大利差得太遠咯。
週薪十萬鎊是否高薪？以打工仔嚟講，當然係啦，以體育明星薪酬計，都算高薪，但未必係最頂尖。十萬鎊乘五十二再乘二點零五，約等於年薪一千三百萬美元，除咗碧咸之外，其他英格蘭球員唔見得有好多廣告合約，加埋起嚟，仲少過我哋姚明。姚明今時今日賺三千萬美元一年，輕輕鬆鬆啫，以前佐敦一年可賺五千萬美元。
與賓架R講起，佢就認為TigerWoods會係最高收入嘅體育明星，賓架R話：「淨係睇獎金收入，老虎仔相信已收入過千萬美元，加埋廣告，更唔得了，何況仲有出場費呢？佢好貴好貴㗎。」後來左丁山在另一位賓架口中，知道老虎仔活士來亞洲出席商業活動，譬如到觀瀾湖，出場費要成二百萬美元，到上海參加滙豐贊助嘅高爾夫球賽，亦盛惠二百萬美元。老虎仔比較少到歐洲參加比賽，原因之一係佢要集中於美國贏經典賽事，原因之二就係要安排時間出席商業活動，佢賺兩百萬美元好輕易㗎咋，就係與一啲贊助商嘅尊貴客戶打波，打十八洞可與十八個主席/總裁級人馬做對手，輕輕鬆鬆表演一番，易過食生菜！
賓架做生意，極注重透過高球嚟拉關係，已經被炒魷魚嘅前美林總裁奧尼爾每到香港，都會與大客戶嘅頭頭打番場波，香港賓架唔係佢嗰皮。左丁山對賓架R講：「曾特首去年笑罵你哋去咗打波，唔記得打開中國生意大門，現在仲有冇打波呀？」賓架R話：「我哋工作時工作，拼命到極，玩嘅時候打波點解唔得呀？梗係照打啦，你哋傳媒唔好渲染就好嘞，我哋好節制嘅！」係噃，觀瀾湖有高爾夫球世界盃舉行，賓架R等都有上去睇，佢話：「冇老虎仔出場，氣氛真係差啲嘅，你哋中文傳媒都懶於報道啦。」