揸咗幾年車，跟長陣車款始終緣慳一面，可能如大部份女仔一樣，潛意識害怕舞動呢類大怪獸。今勻領旨要長期實試積架呢部XJ8，惟有硬着頭皮幹吧！揸足兩日，發覺XJ8就如其香檳金外表一樣，溫柔操控加體貼設備，的確令駕駛者及乘客相當陶醉，呢種精神上的「安全醉駕」，的確大大減低小女子的「恐長」心理。
記者：梁美甜
攝影：黃子偉
模特兒：Heidi（TheGroup）
招搖長陣夠虛榮
XJ屬Jaguar嘅旗艦車系，XJ8更係當中王者，佢富有Jaguar英式貴族嘅特色之餘，亦兼具高科技於一身，今勻有機會同佢親近，滿以為大大部車操控有難度，結果是除初段有點手忙腳亂外，佢嘅軚盤靈敏度、油門實在感，均令我好快便適應，溫柔地順着我意思加速、收車、轉彎，完全毋須費勁跟它角力周旋，完全改變我對長陣車嘅偏見。
由於車身採用鋁合金製，大大減低重量，加上3.5V8強力引擎，令XJ8動力更強，加速爽快利落，最重要係連煞車反應亦相當靈敏，大膽講句，女仔都駕馭得來。不過要習慣路人及鄰車之注目，事關金光閃閃嘅XJ8加上積架獨特典雅外形，喺條街度實在相當搶眼，但我就好陶醉呢種虛榮嘞。
三失揸車實錄
第一日：跟代理借來XJ8作長期測試，當然要盡情操勞吓佢；由積架香港仔Showroom出發一刻好迷茫，新界區我就熟，但港島區於我而言同迷宮無分別，迷失於田灣、中區及東廊，兩小時後終於摸到返公司，有驚無險。
第二日：預定目標係去QE覆診，由將軍澳出發，喺太子道早咗一個路口轉，錯入公主道諗住跟路牌入何文田轉番出嚟，點知越行越Lost，仲兜咗落土瓜灣，大半個鐘至兜番去目的地。
第三日：到北角碼頭同老編交收文件，一出東廊喺北角出口落橋，錯出英皇道去咗炮台山，沿路上埋寶馬山、渣甸山，結果見到海逸酒店先知自己去咗鰂魚涌，死死哋氣沿路牌兜番落北角。
幾日慘烈迷失，反而試到XJ8喺多彎多斜多窄路、上山落斜嘅表現。慢溜斜路有力，腳踏反應快而靈敏；俾人呠要速走時，起步加速快而有力，輕掂油門已貼近限制速度，輕輕鬆鬆跑完東廊，夠Powerful。唯一要注意係XJ8始終比一般房車稍長約兩呎，窄路轉彎及泊位時要小心啲，尤其柱位多多嘅狹窄停車場，偷位成重要技術，幸好XJ8軚輕及敏捷反應幫到我唔少。
方便乘客司機煩
XJ8貴為老闆車，所以車櫳絕對係超豪兼舒服，空間夠大，攤喺度聽歌睇DVD碟鬆弛一下。但作為駕駛者，反而有少少唔方便；首先係錶板無波段顯示，唔知自己用咩波，轉玩半自動波就唔多方便，而且前座，尤其係駕駛座都無咩地方放散銀同車飛，或者預咗用家都係用AutoToll同自己車位囉！除咗呢啲小問題之外，XJ8的確為我帶嚟唔少震撼，超強操控性能同反應之外，就係以3.5V8引擎而言，XJ8幾日行咗230幾公里先至差不多用咗一缸油，算係咁啦！
a.揸豪房就梗嘆啦，揸緊車唔飲得香檳嘅話，轉杯Perrier一樣好Feel！
b.多數豪房都有嘅天窗反而無咩驚喜，可能車櫳大而顯得天窗偏細。
c.三圓錶板包銀邊，夠晒典雅，絕對符合Jaguar一向嘅形象。
d.前後座各設獨立出風口及調節裝置，體貼前後座乘客。
e.Jaguar素來都係用Handmade皮椅，又點少得旗艦車系XJ呢？
JaguarXJ83.5SELWB規格
引擎：3,555c.c.V8
馬力：262ps/6,250rpm
扭力：34.1kgm/4,200rpm
傳動：ZF6前速自動波
查詢：積架汽車（25200989）
供款幫你計
首期：$89,900
利率：6%
每月供款：約$20,900（48個月）
＊以上數據僅供參考
08款 Facelift再豪啲
今次長期測試嘅係上一代XJ8，至於新車就係Facelift過嘅2008款，外觀上鬼面罩同揼把Modern咗，車側多兩個排氣口同車頂天線，車櫳就頭腳增加咗空間，皮椅換咗皮多咗承托力，整體豪咗舒服咗。以3.5SELWB而言，2008款售$1,088,000，以60個月供車計，每月大約供二萬蚊多啲，老細級算濕濕碎啦！
