大型籌款節目《歡樂滿東華2007》，下個星期六舉行，負責表演「空中羅漢樂滿Fun」的官恩娜（Ella）、梁靖琪（Toby）、裕美、徐淑敏（Suki）、鄧穎芝同EO2成班人，前晚喺將軍澳電視廣播城練習。
眾人喺錄影廠大樓最高處吊落地下，雖然無綫做足安全措施，現場又有武術指導教路，但當時天又黑又大風，第一個試身手嘅Toby，不單止遲遲唔敢試，仲喺半空度嘩嘩叫。
反而平時嬌滴滴嘅Suki同Ella就淡定好多，Suki試玩時仲俾武指大讚好身手。至於EO2扣上安全扣後，下身呈V字形，令眾人頓變「現代」猛男，其間抵死的Otto更一手揪起Osman嘅繩索不停轉圈，將Osman勒得又緊又痛。
Toby似自殺
Ella雖然表現淡定，但就自爆嚇到想去小便，試玩後先知唔係想像中咁易。舊年鄭希怡表演空中飛人時發生甩褲事件，問Ella表演嗰陣着乜衫？佢話：「我哋呢個項目又唔會甩嘅，衫褲未知着啲乜，不過，我會盡量畀意見，唔好着兩件頭。」事後Toby話：「開頭以為自己唔驚，但面對時個心好怯，條安全繩勒到大髀同內側好痛，我條腰有舊患，有啲自殺嘅感覺。」
