當大家為屋企收唔收到數碼廣播煩到一頭煙時，SHARP再為大家添煩惱！新AQUOSGX3系香港首度亮相，向稱LCDTV機王級嘅AQUOS系列，玩FullHD、食盡1080p已是必然，不過更強係機身厚度喪減27%勁慳位後，畫質仲推上10-bit（10億色）配100/120Hz流暢靚畫質，現場肉眼睇馬上將前朝8-bit（1,600萬色）機王PA63比下去，現場觀眾評價係靚成倍有多！
記者：朱崇德
攝影：林栢鈞
全新GX3系第一樣引起筆者興趣，係同時推出52、46、42及37吋四個型號！明顯將最普及細尺寸的32"叮出局！大膽講句，32"入門Size𠵱家只算係睡房床頭機，新GX3呢段時間推出明刀明槍打數碼廣播，可見大尺寸將會成為未來主流；價錢暫時玩神秘，行家估價比PA63只微調升幾個巴仙，極吸引！預計12月初大軍壓境。
10億色艷麗畫質
機身Panel同用第8代玻璃基板，行足數1920×1080像素（16:9），配上10,000:1動態對比度同450cd/m2亮度，完全玩盡1080i及1080p靚靚畫質，驟眼睇好似同PA63系差唔多；但據知雖同為第8代Panel，但卻經過特別改良，加上在色彩方面，由舊機的8-bit（1,600萬色）增強至10-bit信源處理，可顯示顏色能高達10億種，感覺最明顯分野是「色彩過渡」更為平滑細膩、層次分明，就現場好多記者觀後感，都話色彩表現靚成1倍有多！
另外GX3系還加入了全新開發FineMotionAdvanced雙倍掃描處理器，能在原有的活動畫面中加插影像，將電視每秒所展現的影像數目（Pal50/NTSC60）增加1倍，達至每秒100/120幅，能有效降低高速影像所造成的模糊或殘影等現象，加上4ms特高速反應時間，畫面就更流暢舒服。
新舊機王畫質比一比
新GX3明顯色彩層次豐富好多，色彩表現亦好自然，立體感出晒嚟。
9.2cm厚度超Slim
GX3系另一大賣點，係機身勁減磅兼Slim，以最巨型的52"LC-52GX3H為例，機身深度僅為9.2cm，與前系列相比，厚度大大減少27%（機身重量亦同時減輕了25%），加埋佢約只有4cm的超薄邊設計，機身體形望落更Slim兼慳位。為配合LCDTV多媒體功能於一身，基本視頻、S-Video、光纖、同軸、PCInput完全有齊，為玩靚音像，機前、機後仲加入3組HDMI（兼容HDCP）及2組色差輸入。
名人品評：色靚機身薄
屋企都有睇開LCDTV；新GX3畀我好強烈感覺係吋數夠大，但感覺機身好Slim；畫質真係好Fine，顏色亦好標、好出，邊位又夠實淨。
FullHD熱機呢期做乜價？
數碼廣播在即，好多人都想出部FullHD薄電視玩吓！據西菜行內人報料，可能大家呢排搵到錢，近大半年嚟都係以日系貴價機最多人搶，當中尤以2S（SHARP、SONY）嘅銷量叮噹馬頭，啲客話感覺都係呢兩個品牌畫質靚啲！32"入門雖然係最高銷量，不過個勢係漸走去40零吋呢啲大吋數！
