鹹魚會翻生，鹹水草都一樣得！人人講環保，間間超市紛紛發起無膠袋日，鼓勵大家自備環保袋，減輕膠袋用量。百佳率先學人帶頭收膠袋費，但只推行五天，便以「多一事不如少一事」和免閒言閒語為理由，取消計劃。既然大家都有心搞環保，潮流一向古老當時興，用鹹水草紮嘢扮懷舊，翻生確實有理！呢排勁Hit嘅鹹水草似乎無處不在，電視電台有講、報紙有提，連環保團體綠領行動都鼓勵街市多用草！後生一輩唔識紮鹹水草？今日一班年輕人就衝入長洲，速學鹹水草紮餸技量傍身，分分鐘第時買波鞋玩具都要齊齊紮！
記者：陳諾堯
攝影：梁細權
Model：Aisha、Bonnie、Polok
新一代勇闖長洲學鹹水草
鹹水草於五十至七十年代最為興盛，但後來因膠袋的引入而被取代。用鹹水草紮餸對現今的年輕人來說，可被視為一項「失傳絕技」。要令鹹水草翻生就事必要坐言起行，學習「紮」的秘技。長洲這個環保小島，大多數居民都是步行和踩單車，除了消防車和救護車，根本就沒有其他交通工具。既然要學環保紮技，係長洲學紮鹹水草就最啱不過，又最容易拜師啦！到時返出九龍，紮玩具、波鞋都冇難度。
「紮」的秘技
今次記者請來長洲居民茜姐教大家點樣用鹹水草紮餸，後生潮人咪走寶。學定「紮」的秘技，好過用環保購物袋。首先有兩種結大家要學識，咁就差不多乜都紮得，萬無一失！生結是用來紮一些較輕的東西，例如菜、紅豆、雞蛋和粉絲等等，很容易解的；而死結則是用來紮較為有重量和活生生的東西，例如魚、蟹、西瓜和冬瓜等等，比較穩陣同難解。
生結
1.將鹹水草打孖再打交叉，繞在矮瓜外面。
2.用沒有圈的鹹水草圍着有圈的鹹水草繞三個圈。
3.再把鹹水草尾部攝入縛住矮瓜的大圈之內，便是生結。回到家，一扯即鬆。
白菜芯：是要用生結紮的，事關較輕身，用生結已經夠穩陣。
死結
1.用針將已打孖的鹹水草穿過冬瓜，有圈的那邊要留較長一些作手挽之用。
2.將頂部鹹水草全部一齊打個圈，再索實，便是死結。
冬瓜：通常是會用針穿過冬瓜，放鹹水草入針洞，之後再用死結紮實。
鹹水草紮餸大測試
以前無膠袋呢回事，買餸會自備餸籃、筲箕同碗。例如買蝦可以用筲箕，買豆腐可以用碗等等，其次用鹹水草就真係紮乜都得。但鹹水草在用之前一定要浸1-2小時，令它變成柔軟先可以用。因為買番來的只會是亁的鹹水草，因缺乏韌度而紮不到東西的。紮餸絕技簡直是有回到從前的味道，大家不妨齊齊紮，紮出嚟個樣仲靚過用膠袋好多㗎！
街市檔口齊聲支持
眼見長洲街市的海鮮檔、豬肉檔和雜貨舖都仍然堅持用鹹水草，其實要令鹹水草於香港翻生似乎一啲都唔難！長洲街市檔口東主齊齊大叫全港一齊用鹹水草，支持環保。
同場加映：勁襟用塑膠帶餸籃
廢物利用一向係環保所推崇的觀念，離島居民似乎更加反應熱烈。很多婆婆一得閒就會去執那些用來縛紙皮箱的彩色塑膠帶。之後攞番屋企織餸籃，自用和售賣都有，顏色鮮艷，此舉既環保亦可當做些小生意幫補家計，一舉兩得。
