30/11/07.....
天晴
最新動態
𠵱家天寒地凍，捱夜睇波有時都幾難頂，不過興趣所在，工作所需，頂得住周公急call，我都會義不容辭；禮拜三深夜我就「㩒足」全部歐聯直播賽事，加埋之後由英國超級猛人球評家主打嘅賽後檢討及精華節目，自覺獲益良多，希望對嚟緊周末貼波有幫助，助人助己。
睇完歐聯加精華已經天光，好彩〈妙手III〉後有兩三粒鐘空檔小睡，晏畫返工都唔會恰眼瞓。我不喜馬後炮一味吹捧球隊，不如從中搵出當中破綻，以免之後追寶尾中伏。首先，利記若被迫全季續用希比亞拍加歷查任雙中堅，相信有幾多射手都冇用，大炒波圖不足以掩飾兩人面對對手中路快速進襲後嘅破綻，其實波圖有機會領先半場；而賓帥賽後紅着鼻子接受記者追問與領導層不和事件時，左閃右避，已顯出球會有換班子嘅危機。
估不到洛辛堡缺賽兩三周，狀態急速回落，中場攔截全無，實不足以反映車仔大勝嘅真正威力，周六早場匆匆再出，對中場攔截勁幾倍，兼有保耶復出嘅韋斯咸，主場缺坐波監艾辛嘅車仔小心熱倒。
華倫西亞早段踢少個，仍差點殺退史浩克04，反底可期，周日主場迎戰畢爾包，高興見到阿仙奴舊將伊度復出，今場炒得起；相反，些路廸好運，出線在望，周六蘇超早場作客神經刀赫斯，相信未興奮完，難望冧莊。
期間不斷㩒去睇英超，布力般慘負維拉，全因隊長賴恩尼爾遜被逐，嘩！維拉已聯賽4連勝入11球失1球，評分去到高點，周末迎戰上仗對西維爾揸流攤嘅阿仙奴，我唔信禮特拍拿臣，加埋卡臣打龍門真係咁穩陣，搵聖誕使費，呢一注早押！
賭波可以騎牆轉軚，跟紅頂白，但支持民主，就絕不應含糊，周日港島區選民記得投票！
http://hk.myblog.yahoo.com/footballexperts/
逢周一至五見報
蘋果波神
股市大旺，英超盛世，大家齊來贏多啲！