「有個男人打畀我，問我係咪需要sex？」
「整容係罪嚟㗎！」
「俾人鬧到衰過做妓女！」
三個女人一個墟。由整容三嬌石詠莉、甄穎珊、陳樂榣湊成的性感組合Freeze，她們你一句、我一句；你一露、我又露；就算被狠批販賣嬌軀、污染公眾靈魂，實情卻是超過14萬人次上YouTube趁墟，金睛火眼昅着她們的火辣MV。
像樓宇翻新，拆骨剝皮重建，Freeze的人工外殼和性感包裝背後，各有無法改寫的歷史。父債女還、家道中落、平白賣身，「請給我們一個機會。」你會sayyes或no？
撰文：朱倬誼
攝影：陳偉權
化妝、髮型：JanSuen@OneMakeUp
便服：Replay
身世篇：我們的故事 飽含辛酸
甄穎珊：阿爸破產，我每日10蚊食個飯……
「我爹哋媽咪年紀大喇，細佬讀緊中五，有排未出身，爹哋身體唔好，仲要做嘢維持家計，我做呢行三更窮五更富，本來可以打份工，做吓金融、保險，收入可以穩定啲，但家人仍然畀機會我，行我想行嘅路，所以好感謝佢哋支持，當我喺台上表演，望到佢哋喺台下時，真係忍唔住喊。
「我爸爸以前做地產，以前屋企好有錢，住筆架山，1997年金融風暴令佢破產，我哋要租屋住，爹哋轉做勞力搵錢嘅工作，好辛苦，收入唔穩定，手停口停，仲整親條腰。兩、三個月前，爸爸腰痛，成個月返唔到工。冇返工係一筆錢，睇醫生又係一筆錢，嗰陣我會吃力啲，成份糧冇晒，每日10蚊食個飯好啦。
「金融風暴咁大件事，但爹哋媽咪仲喺我身邊已經好幸福，因為嗰場風暴令好多人自殺，我曾經幸福過，有好多一出世乜都冇。我𠵱家嘅幸福係一家團聚，我好想爹哋快啲退休，等我養佢同媽咪。」
甄穎珊（Carisa）
年齡：27
三圍：31C、24.5、34.5
整容部位：植髮、抽出雙乳PAAG再裝矽袋隆胸、雙眼皮、隆鼻、6隻牙套
石詠莉：初做model仲慘，10萬蚊未收過，諗起想喊……
「以前我係自由身模特兒，試過經一間模特兒公司簽約，幫某間美容院影廣告硬照，簽約一年，收3,000幾蚊，今年初已經約滿，但到𠵱家嗰間美容院仲未除我啲硬照落嚟，真係好過份！我因為搬屋唔見咗份合約，我同模特兒公司講，佢哋就諸多推搪，所以喺香港做自由身嘅模特兒都幾慘，冇得嘈，有啲模特兒公司會隨時唔畀嘢你做，好驚，好無奈，你告佢，又唔知搞幾耐，但搵咗經理人公司後就好好多啦。
「我舊年做有線世界盃嘅angel，做咗成個月節目，仲要包晒宣傳活動，人工係萬零蚊，我接呢個job係經模特兒公司介紹，有線一早畀晒錢呢間公司，但公司係咁拖，後尾仲執埋，我一毫子都未收過，白做，真係慘。
「初初我做model時仲慘，有間公司畀好多嘢我做，話三個月後出糧，當時我不停做嘢，條數接近10萬，每次追佢哋，佢哋又係咁拖，後尾先知公司個老闆去咗外國，啲職員都出唔到糧，報警都冇用，我諗起都想喊。」
石詠莉（Sukie）
年齡：20
三圍：34C、23.5、35.5
整容部位：割雙眼皮
陳樂榣：為還錢俾人又攬又錫，我曾食安眠藥自殺……
「我媽媽係上海人，家族好有錢，喺上海時係住四合院。我爸爸以前做咖啡批發、開茶餐廳、炒樓，97年金融風暴後，佢走咗佬，但佢啲物業全部寫阿媽個名，阿媽要孭晒啲數，成300幾萬，當時我喺加拿大讀緊書，返香港諗辦法還錢，阿媽唔想喺佢家人面前瘀，唔肯搞破產，佢跪喺地下求我：『要破產，我死咗好過！』
「為咗還錢，我哋問阿公、表哥借錢，我日頭做地產，夜晚做酒吧拳手，好彩投資股票賺到啲，但還到今日，九年啦！𠵱家仲爭銀行10幾萬，相信好快可以還晒。
「我試過自殺㗎！嗰時我18、19歲，嗰筆錢對於我嚟講係天文數字，覺得還極唔完，所以做拳手嗰兩年好唔開心，喺酒吧俾人又攬又錫，又試過俾人摑到嘴角流血。有次我收工飲醉酒，買咗50粒安眠藥，吞咗之後約咗幾個朋友出嚟講遺言，講講吓開始嘔、暈，跟住就送入醫院洗胃，𠵱家諗番轉頭，嗰時梗係好儍啦。」
陳樂榣（Alley）
年齡：23
三圍：34C、24、35.5
整容部位：割雙眼皮、開大眼（眼頭）、隆鼻、打Botox、4隻牙套
受侮篇：屢受性騷擾 提起火滾
整容三嬌性感又風騷，男士們看得熱血沸騰。做得性感icon，少不免招惹各式fans，問價、接色情電話、網上留言性騷擾，被移花接木做鹹網webJ，三嬌全都試過，互相交流性騷擾經歷，她們說得激情，兼且激氣！
（甄：甄穎珊 石：石詠莉 陳：陳樂榣）
甄：試過有男人打電話畀我，問我係咪需要sex？佢話我個電話號碼放喺乜嘢sex網站，列明Iwantsex喎。
石：有人話畀我聽，話我做咗三級女webJ，有人竟然將我張相擺落成人網站。
陳：facebook通常用自己嘅msn地址登記，有啲不明來歷嘅人，問「你三個係咪出嚟做㗎？收幾多錢？」幾變態呀！
石：有次我哋出event，有個男人都一表人才，行埋嚟搭住我膊頭，「今晚同我返屋企，畀10萬蚊你。」我即刻推開佢囉。
甄：有啲乞人憎嘅會打電話嚟問價，呢排有個女人成日打電話嚟，話「我老細好鍾意你呀」，我問佢老細係邊個？佢話「李老闆」，又話「你快啲出嚟，一晚要幾多錢啫？」我覺得佢變態囉。又有另外一個女人打電話畀我：「出面啲人唱你寸，問好價、約好老細，你唔到，唔好咁寸，接吓客，開到10萬啦！」我唔會搵呢啲錢！選亞姐時最多人問價，但我情願選擇整容，都唔揀嗰條路，如果要俾人包，一早做咗啦！使乜??家咁辛苦？我一世都唔會出嚟撈，我一定要有愛至可以有性，齋性唔得呀。
石：我最憎啲人用鹹蟲眼光望我，平時我喬裝扮四眼妹，當乜都睇唔到。
陳：有時搭地鐵、巴士，都會感受到色迷迷眼光，啲人仲拎個手機係咁影。
石：有朋友睇我出宣傳活動，事後同我講番話有啲人講嘢好過份，話「畀我扑一次都願！」唉，我聽完就算。
陳：佢就想呀！出席活動冇計啦，平日啲人望？「望咩望？」
石：有乜嘢事，我實捉住佢㗎！
陳：我會批頸、撩陰腿！
甄：我會揸住佢重要部位，有咁大力得咁大力㖭呀
歧視篇：遭同行白眼 越罵越強
由踏上整容路開始，Freeze一直被負面新聞包圍，受盡白眼閒言，被踩至體無完膚，整容後被紮成木乃伊，她們的星途特別難行，有血有汗有眼淚。說起來，一疋布咁長。
陳：我哋試過同啲歌手大圍影相，搭吓膊頭啫，其他歌手都有白眼，當我哋打招呼透明，好鄙視；TVB台慶排舞時，有人話「唔好累街坊，跳好啲呀！」
石：佢哋都未了解我哋個人已經先入為主，企埋啲影相好似影響佢咁，好乞人憎！大家搵食，都係人啫，唔忿氣囉！佢又唔係出名，又唔係大牌，都要受佢氣？但要多謝佢哋，我要再做好啲，我哋係為工作同目標奮鬥，有啲人喺網上講到我哋污染人哋嘅靈魂、思想，佢哋誤會晒Freeze，我哋唔係出街都性感，唔使鬧到我哋唔係人，衰過做妓女，我哋又唔係打劫、犯法，我哋有付出㗎。
陳：我估唔到香港人反應咁大、咁保守，整容係罪嚟㗎！成日話身體髮膚受諸父母，但我哋唔係毀容呀，冇對唔住父母。我哋組成Freeze，唔係特登影衰樂壇，係畀新嘢大家選擇，香港未試過有性感組合，最唔明香港人點解對外國性感組合拍晒手掌，香港有就咁盲塞？我哋就變咗「再造人」、「整容三嬌」，我明白係噱頭，但好難受，認咗俾人話，冇認又唔知整咗嘅藝人就冇事，我個人認為香港人唔好咁鴕鳥啦，加上我哋行性感，批評係博出位、淨係識得露個胸出嚟，香港人太尖酸刻薄，又話我哋似AV女郎，聽到好嬲。Freeze出道時係夏天，成日要着比堅尼，初頭唔係太鍾意，我知我哋係新人，傳媒係要呢啲，係要配合，但香港人要鬧又要睇，我哋就一路俾人鬧一路又要着，真係眼濕濕，覺得做乜嘢呢？比堅尼小姐咩？但我哋明白行咗第一步，就冇理由縮。
甄：我參加亞姐時着泳衣，啲人話性感、好睇，我唔明??家就俾人叫暴露，我哋三個由零開始，唔識唱歌跳舞，每日排足八個鐘，係有努力付出，希望觀眾唔好唇槍舌劍，給我們一個機會啦