記得莫鎮賢嗎？他參加1985年新秀而晉身娛圈，輾轉已經歷了22個年頭，出道時無名卻有利，以為做歌手很容易就輕鬆談放棄，在弱肉強食的娛圈中不懂生存之道，這些人生經歷莫鎮賢現在能娓娓道來，並將這些經驗教導他的門生。
莫鎮賢曾入圍1985年新秀歌唱比賽，當年金獎得主是杜德偉、銀獎是蘇永康，兩人現仍活躍於樂壇，反觀莫鎮賢，叫人最有印象的應該是他與一班華星歌手跟羅文合唱的《浪淘沙》。
涉獵太廣難成大器
加入樂壇22年，莫鎮賢好像從未決心闖一番事業，雖然早年一度活躍於樂壇，卻忽然消失7年多，原來他主力開辦唱歌跳舞學校培育下一代，到去年他因為妹妹在車禍中逝世，加上眼見羅文、張國榮及梅艷芳等巨星相繼離開，令他決定再闖樂壇實踐夢想。
莫鎮賢日前在其位於上環的學校接受訪問，現場近20名學生急不及待聽莫sir訴說人生經歷，他說：「參加新秀之後簽咗華星，係一個好好訓練，因為我一年有300多日都係酒廊登台搵錢，嗰時會覺得公司當我係搵錢機器，但𠵱家諗番轉頭就會感激公司畀我時間浸淫。自己好奇心大，成日想試唔同嘅嘢，於是就走去拍劇，又去做DJ，可能範疇太散，搞到成就不大，不過自己就冇後悔，如果畀我好快上位，可能我又唔識珍惜。」
年月磨出生存之道
莫鎮賢坦言以前覺得要入行做歌手很容易，只要參加歌唱比賽就會有人賞識，但隨着時代改變，要在娛圈站穩不容易，他說：「我記得試過喺台慶ending時，因為唔識爭位企而被人迫落台，𠵱家梗係唔會啦，肚腩大咗嘛，不過我就想做到好似哥哥張國榮、梅艷芳、羅文咁，佢哋好無私，唔會同你爭位之餘仲會畀機會你企中間，因為佢哋有好強嘅自信，呢個係巨星嘅共通點。」
採訪：駱華齡 攝影：陳志嵐
