港島區立法會議席補選，八人參選，只有兩人有希望當選；十一月廿五日八大電子傳媒在遮打花園舉行選舉論壇，據在場人士講，現場情況混亂，一批聲稱支持葉太嘅擁躉喺下午大會綵排之前，已經入場霸位，大會人員請佢哋出去，當然唔係友好交流啦。到論壇開始後，嗰批聲稱支持葉太（葉太話不知情）嘅人士以粗言穢語等辱罵陳太一方，仲混亂過維園阿伯在「城市論壇」散場後追罵何俊仁之場面，《南華早報》記者稱呼呢班人為mob，都幾得人驚。
如此場面，損失嘅反為係家庭觀眾，好多時聽唔到啲候選人講乜。限於選舉規則，八人一同出場，給予相同時間，選民最關心嗰兩位候選人，其實講唔到乜嘢，所謂論壇，得啖笑。不過選民投票畀邊位，早已心中有數，論壇不會改變任何預設立場。最重要嘅，係港島區選民，無論你哋聽日要去打高爾夫、要去睇戲，去出席投資研討會、打麻雀、購物還是去街市、去抹車、去大嶼山遠足，請你哋務必投票，晨早投完票先至打番十六圈直落，唔使心思思，無謂等到晚飯後先至去投票話吖，到時緊張得滯，因住消化冇咁好㖭！候選人除陳方安生，葉劉淑儀之外，還有蕭思江、凌尉雲、何來、李永健、蔣志偉、柳玉成。
今星期最令人驚奇一件事係香港地產代理界第一代人物王文彥（大家都知道佢與施永青創辦中原地產）居然會發表文章，澄清所謂十成按揭嘅種種誤解。篇文章成二三千字，大編輯睇完又睇，覺得篇文章好技術性，好詳細，睇完就知道指控者毫無理據。所有寫過十成按揭報道/文章嘅記者編輯都應仔細研究，睇完就知道佢哋自己對物業買賣及按揭之認識不足。左丁山識王文彥好耐嘞，唔明白佢點解會路見不平，拔筆相助，打電話搵佢問吓，知道佢不在香港。王文彥平時極少談政治，但對地產代理嘅專業知識，十分執着，不容下屬誤解。選舉就選舉啦，迂迴曲折咁搵舊料撻人，你估選民係儍嘅咩。