網友吳小姐噚日推介和黃（013），佢上月尾喺96蚊高位入咗貨，推介原因係「覺得佢好，有前景，有3G嘛」。3G？和黃接3G已經唔係新聞，難怪孫柏文問：「嗱，和黃搞3G已經搞咗好多年，點解要喺96蚊嘅高位，先至突然間對佢嘅3G咁有信心嘅？畀個理由嚟呢！」
吳小姐話：「好難講嘅，嗰陣時啱啱見佢起緊，咪買囉。」既然由於3G因素買和黃，何啓聰就問：「咁你有冇用過3G先？」吳小姐話：「咁又冇喎。」何啓聰再追問：「冇用過，你又點知道佢前景好呀？」吳小姐終於講出原因：「個朋友話好，唔怕買喎！」
前景唔單止睇3G
噚日港股大升，和黃亦跟隨大市裂口高開，其後穩步上升，曾高見90.65蚊，收報90.05蚊，升3.6蚊或4.16%。
不過，𠵱家相比吳小姐嘅買入價，累積跌幅近5.6%，何啓聰指：「和黃嘅前景唔單止睇3G，仲有加拿大赫斯基能源，同埋碼頭業務，啱啱嗰時中外運航運（368）上市，航運股被炒起，大家一窩蜂又睇好和黃，嚟緊股價應該跟番個市走嘅機會大啲。」
破百不成先走貨
孫柏文亦話：「股票價格係反映公司未來前景，港股直通車時，大陸股民因為李嘉誠品牌，唔理前景，瞌埋眼去買，由70幾蚊炒上近百蚊。」和黃10月時，一度炒高到98.4蚊。
何啓聰謂：「你可以趁市況高啲，諗吓先沽貨。𠵱家睇資金流向，大市未必可以一下子上番3萬點，如果上番3萬點，和黃亦有機會返番去96蚊。」
他提醒，若96蚊買和黃，係寄望股價衝破100蚊；但結果如未達到，呢隻股可以跌得好深，所以破關不成，最好先走貨。
中外航運（368）
「周期性股」得人驚
屯門劉先生想請教下中外運航運（368），話自己呢幾日炒左隻股幾轉都係輸錢。佢諗極都唔明，點解噚日航運股升得咁厲害，中外航運PE（市盈率）又唔係特別貴，點解都係唔掂呢？
新股炒得太盡
何啓聰解釋：「一來航運周期性加上美國經濟可能放緩，對航運股都有影響；而且新股如果已經令好多人蝕錢，亦會影響表現。」
孫柏文都認同：「因為實在太多蟹貨嘞，係咁簡單唧！但呢排啲新股都真係炒得太盡囉，以前東方海外（316）幾年賺大錢，PE都係5、6倍，個市係唔俾你上都無計。『周期性股』真係令人好驚㗎，所以就算中外航運預測PE都仲有廿幾倍，都可以解釋到點解無得升囉。」
劉先生仲好奇怪，點解保薦人好似無護盤咁嘅？睇佢沽極都仲有咁多大盤。何啓聰笑謂：「𠵱家啲散戶都好大㗎！」
中電信（728）
3G一出可爭鋒
尖沙嘴JimWong推介中電信（728），佢本人喺6.21蚊買入，目標價睇7蚊，止蝕位則定喺5.8蚊。Jim認為，只要3G牌照發出，基於內地電訊政策不會傾向一家獨大，本身沒有流動業務經驗的中電信，有機會獲得政策傾斜。
Jim嘅投資策略，暫定為期3個月，何啓聰說：「就炒短線而言，噚日嘅成交金額似乎未能配合。」此外，佢又進一步提醒話：「中電信即使獲發3G牌，仲需要大量嘅固定資產投資，例如鋪網、宣傳同埋手機補貼，長遠嘅股價，仲要睇管理層嘅管理能力。」
JimWong覺得：「股票嘅野，炒expectation㗎啫，中電信最好嘅情況，就係政府撥出一區比佢經營。」不過，孫柏文同埋何啓聰都話機會唔大。
中移動（941）
炒股讀心理好過
旺角LuLu前日打過上嚟，話早前大跌市放晒啲貨。佢噚日再打嚟，睇見美市前晚升咁多，覺得錯過咗個入市好機會，佢問點解周圍都係壞消息但大市都照升，究竟係咪可以入市呢？何啓聰就話：「入市係相對性嘅，早前反而是入貨機會，𠵱家升咗上嚟反而可以沽一沽先。散戶常犯嘅錯誤就係：跌得好殘時又唔夠膽買，升咗上去又覺得自己錯。」孫柏文即刻引述曾淵滄名句：「炒股票，讀心理好過讀經濟。」
事實上，LuLu幾睇好後市，想等中移動（941）跌到125元再入市長揸，何啓聰話：「呢個水平（中移動）跟市走嘅機會大啲，遲啲係恒指比率就快降低，一定有啲沽壓。」
孫柏文十分贊同LuLu：「佢Beta咁高，單日波幅都可以由125蚊彈到140蚊呀﹗」
中交德銀call輪（5607）
揸輪最多兩星期
銅鑼灣輪Sam，喺兩三個月前入左隻中國交通建設（1800）嘅call輪（5607），當時成3毫幾，正股價大約18、19蚊，隻輪明年4月先到期，行使價22蚊，但輪Sam𠵱家好困惑，究竟放咗隻輪先定再hold多陣好？
何啓聰即刻追問：「點解中交上25蚊時你無賣？」原來輪Sam當時唔喺香港，怪不得隻輪後來上到去4毫幾佢都賺唔到錢啦！輪Sam解釋：「我睇好中交嘛，諗住隻輪咁長期應該都okay。」
事實上，中交噚日收21.45蚊，但係隻輪就收0.229，距離家鄉仲係好遠。何啓聰睇番數據，「之前大升市嗰陣，引伸波幅炒到60幾，而家得番40幾，你輸就係輸引伸波幅；就算正股唔郁你都蝕時間值啦。」佢仲叫輪Sam要將「睇好正股」同「睇好輪」兩樣野分開，揸住輪唔可以當揸住正股，佢仲唔怕倒自己米，即使身為輪商都係咁話：「揸輪最多2個禮拜！」
今日嘉賓：
亨達集團研究部董事黃敏碩
每日收市後4:30pm
想搵名家教路，請登入以下網址
http://appledaily.atnext.com/jp/finance登記
歡迎Phonein28698262
成功參與節目者，有機會獲贈禮品
＊以webcam參與節目者，可額外獲贈KFC$100現金券
