噚日掛牌嘅中國重汽（3808）開市前切燒豬，港交所（388）例牌將豬頭豬尾留畀上市公司，寓意好頭好尾，由頭發到落尾。不過，重汽主席馬純濟好奇打開飯盒。弊，乜冇人同馬主席講，燒豬頭尾唔可以曝光咩？
華華唔係迷信，不過據老行尊講，上市儀式嘅燒豬千祈咪曝光，唔老嚟㗎，話說美維（3313）年初掛牌，司長唐英年細佬唐慶年呢位主席都試過將燒豬頭尾曝光，當日股價僅微升，之後一直潛水，家陣都未返家鄉。咁重汽又點？一開市報11.8元，比招股價12.88元，跌咗8.39%，大家本嚟開香檳祝酒，但見個勢咁，全場鴉雀無聲，最後收報10.86銀，招股價跌15.68%，真係好嘅唔靈醜嘅靈。