網友Shering噚日推介恒基發展（097），佢解釋話：「睇過佢派息紀錄，嚟緊12月初會派特別息1.03蚊，都幾和味，同埋佢出年2月好似話仲會有其他特別嘢，所以諗住如果入到嘅話，會hold住一排。」
不過，Shering話𠵱家個價仲未啱，所以仲未行動，佢建議15.5蚊買入，揸3個月，目標價17蚊，睇升近1成，止蝕價14.5蚊。
沈振盈話：「恒發你應該當係一間控股嘅公用股公司，息就唔錯，但如果純粹貪息，你就要計吓數。佢嘅股價睇年頭到𠵱家，上升嘅幅度都唔細，最主要係憧憬之前私有化同埋買煤氣嗰啲因素。𠵱家無論股息定特別股息都好，你要考慮到佢除淨嗰日，股息嘅因素其實會扣番出嚟，所以你要期望隻股收完息之後，股價仲有得升，你先至係唔嘥機會成本嘅做法。」
中電、港燈唔怕買
Shering話：「我唔諗住即買即賣，諗住hold一陣，收吓息。」不過，沈振盈反問Shering：「佢旗下嘅業務俾恒基買吓買吓，淨番三兩樣，煤氣最大瓣，如果煤氣都賣埋，佢就揸吓現金、揸吓小輪，唔係話有乜嘢增長空間，純粹收息係幾好選擇，起碼市價波動唔大，但收息點解唔考慮公用股呢？」孫柏文亦話：「如果貪收息，倒不如直接買公用股，雖然中電（002）同港燈（006）嚟緊嘅電費價格升幅會受限制，但長遠睇，亦唔怕買。」
恒發噚日走勢反覆，一開市就突破16蚊，但冇耐就掉頭回落，中午一度高見16.36蚊，但晏晝開市又回軟，全日收報16.18蚊，股價最後都升咗2.4%。
神華（1088）
一沽即升唔忿氣
何文田David話，前日係42.4元放咗中國神華能源（1088），點知噚日就升咗上去，好唔忿氣。佢話𠵱家仲有批貨坐緊艇，好似中信銀行（998）、中國銀行（3988）、建設銀行（939）、大唐發電（991）同埋碧桂園（2007），想叫大師指點迷津。沈大師話，炒家既定律係，唔好將短炒變成長揸，會好被動，仲話David手頭上嘅組合都唔合佢心水，好似內房股，沈大師唔信喺宏調之下，樓價仲可以大升。
沈大師又話，「國內股市暫時仲冷卻緊，香港中資股無咗中資水落嚟買，呢一刻一定係調整浪。」係咪等？沈大師教路，若果短炒一定唔等；若果長揸，就睇下自已有幾多備用資金，若果用左唔到一半，就可以等；若果用左近9成，有得賺自然計左數先啦。
廣深鐵路（525）
似火車咁慢
大埔關太問廣深鐵路（525）點睇，佢話自己早前喺6.2蚊時已經買咗，𠵱家仲想再入。沈振盈睇廣深鐵路個圖形都okay，「短期我覺得可以彈升；長遠嚟講，呢類股份可以持有，而PE（市盈率）30倍高唔高就見仁見智啦。對於鐵路股，就算𠵱家買左，佢有穩定嘅收益、穩定嘅現金流同派息嘅話，都可以持有嘅，不過股價就未必可以跟得上焦點股嘞。」
關太好感嘆咁話：「係啦，隻股升得好似火車咁慢，之前打算去到七蚊就放，結果差少少，之後就好似撘𨋢咁，又上又落，又唔出又唔入，最後由贏變輸。」沈振盈補充：「加注就無謂，唔見有大升因素。」
財險（2328）
睇30蚊太誇
大埔關公推介中國財險（2328），佢話自己7月時已喺六個幾入咗，𠵱家大把水位，仲將目標價睇到30大元。關公話：「你睇國壽（2628）舊年4月都係10蚊到，今年最高見53個幾，咁財險比起佢唔會太差。」沈振盈就話：「財險比國壽好，呢1年計，佢喺保費收入增長做得幾好；但3隻保險股都建基於AH股嘅投資收益。𠵱家A股升1日跌幾日，財險收入都唔會太理想。」
內銀前景
未係時候低吸
西貢Peter心郁郁，想入建設銀行（939）同交通銀行（3328），但又唔知時機成熟未，佢嘅論調係：「衰衰哋都叫做有間銀行，好似諗得過。」
之但係沈振盈就勸佢，「呢浸跌浪，內銀股相對其他股票跌得算遲，相對『見底位』仍有一段距離，調整應該未夠；至於宏調嘅影響，最大嘅致命傷一定係存款準備金率，加到12厘半13厘嘅歷史高位，再加一定做到收緊銀根作用，但亦會影響貸款增長；𠵱家仲炒到30幾40倍PE（市盈率），市賬率都成4倍幾，銀行股絕對唔係𠵱家嘅入市心水。」
恒指走勢
壞消息陸續來
美孚LoLo想問大市去向：「𠵱家外圍咁多不利消息，股市究竟會唔會繼續尋底？」沈振盈個人認為，壞消息仲未完全反映，佢相信仲會陸續有來㖭！佢又話二萬六點未見底，「期指結算轉倉前後，大市可能會有反彈，但只要大陸一日唔放水，閂住水龍頭嘅話，個市叻極有個譜。」
LoLo原本睇好中移動（941），不過擔心佢喺恒指成份股中嘅比例降低咗之後，會影響股價。沈振盈反而話：「中移動都唔係第一次被降低比例，佢股價都繼續向上，證明呢樣嘢係唔重要，我覺得下一輪升浪，中移動都會向好。」
百田石油（8011）
現價追風險大
深井葉先生見到百田石油（8011）有異動，想請教沈振盈嘅睇法。沈振盈話：「呢隻股曾經喺4毫幾橫行咗好耐，上個月開始轉勢向下，最低去過毫幾。反彈嘅原因，係有消息傳出佢會轉型做石油，不過由於太多散戶買咗，今次算係屍橫遍野。」沈振盈仲話：「呢間公司𠵱家仲係虧損緊，基本分析並唔睇好，現價再追入風險較大。」
另外，葉先生仲提及自己喺中石油（857）17個幾嘅時候入咗貨，唔知下個月中石油變做恒指成份股之後，有無機會見家鄉。沈振盈話：「可能大家會炒中石油轉做恒指成份股，基金補貨會炒上。不過，基金可能喺𠵱家已經不斷低吸。」
-買入價-
葉生建議：— 專家回應：—
-目標價-
葉生建議：$0.4 專家回應：—
-止蝕價-
葉生建議：— 專家回應：—
-時間-
葉生建議：短線 專家回應：可短炒，不宜長揸
今日嘉賓：荷蘭銀行私人投資產品部副董事何啓聰
每日收市後4:30pm
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
歡迎Phonein28698262
＊以webcam參與節目者，可額外獲贈KFC$100現金券
