徐子珊今年認真星運亨通，除了參與劇集及電影演出外，早前更憑無綫劇集《舞動全城》擊敗其他新晉花旦，勇奪「飛躍進步女藝員」。對子珊而言，得獎固然開心，但她也明白「驕兵必敗」的道理，故只容許自己開心兩日，免得過於忘我而迷失了本份。
徐子珊2004年參加無綫香港小姐競選，並以大熱姿態勇奪三個獎項，成為冠軍級人馬，自此獲TVB力捧，新劇一套接一套，經過短短三年的努力，子珊今年終於憑劇集《舞動全城》於「萬千星輝頒獎禮」奪得「飛躍進步女藝員」獎項，為事業掀開新一頁。
望與家人分享喜悅
子珊一直未有想過自己可以奪獎，因為其他對手實力強橫，問奪獎後心情如何，她說：「攞完獎之後好多人同我講恭喜之外，亦有好多前輩叫我要盡快忘記，因為佢哋怕我會因為得獎而驕傲，而忘記咗自己嘅本份。」
奪獎當然是一件開心事，不過子珊自言對日後的演出也帶來相當壓力，她說：「我𠵱家都係用番未攞獎時嘅心態去工作，但就要比以前更加努力，人哋呢刻認同你，所以將來亦都唔可以令人失望。」子珊表示奪獎後一直都未有好好慶祝，問到最想與誰分享喜悅時，她說：「有件事我都覺得好可惜，因為屋企人唔喺香港，我真係好想同佢哋分享我呢一份喜悅。」
新劇演失聰配音員
其實子珊07年可算星運亨通，除了新劇接踵而來外，也有機會參演電影，她說：「我入行之後開始覺得自己好鍾意演戲，而電影對我嚟講係一個好好學習演技嘅地方，因為電影需要好細緻嘅演繹，眼神嘅表現要好清晰，亦都要留意好多嘢，所以對我拍電視劇有好大幫助。」子珊表示希望將來有機會參與舞台劇，問她最想演出那種角色，她說：「其實我嚟緊同馬國明會拍無綫一套新劇，會飾演一個聾嘅女仔，但係佢嘅工作係配音員，所以係一個好大嘅挑戰，咁喺我身邊都有失聰嘅朋友，我都會觀察一吓佢哋日常生活。」
採訪：王崇穎 攝影：陳偉權
