出爐雙料劇帝陳豪同廖碧兒確係啱key，噚日呢對緋聞男女各自出席活動分頭𢱑銀，一個話自己係傳統男人，另一個就話想生仔，如果佢哋結婚組成家庭嘅話，相信都好完美。
陳豪榮升劇帝後即被手錶品牌邀做代言人，噚日佢同陳自瑤、陳敏之去旺角朗豪坊酒店出席手錶活動時，佢堅稱為keep住有嘢撈唔加價：「唔應該加，情願多啲嘢做好過，我係userfriendly，好抵用。」佢話自己入行後好少買錶，亦冇送過手錶畀廖碧兒，自稱係傳統型男士嘅陳豪又話較鍾意送花畀女仔：「我係保守有心思型，鍾意親手做勞作送畀人，最拿手係素描。」但佢暫時就未有機會為碧兒畫素描。
出書教養狗
至於廖碧兒噚日就去元朗廣場出席聖誕活動，大會搵嚟一班小朋友扮陳方安生、葉劉淑儀、環保女鬥士何來等人物，碧兒見到班小朋友時鬼咁開心，仲同其中一名肥仔影合照，佢話見到咁多小朋友心情特別好，因為自己最鍾意細路仔，一早講定24歲要結婚開始生仔，仲要生夠7個，不過𠵱家歲數過咗仲未結到婚，所以養住5隻狗仔補數，而遲啲佢會推出講述養狗心得嘅新書《我們是一家》，收入會撥捐福幼慈善基金。