自言一世好有女人緣嘅卓能（131）主席趙世曾，平時出出入入，已經大把女喺身邊，就連賣樓都不忘展示吓佢嘅風流本色，平時其他發展商賣樓，最多都只係請幾個model做吓樣，佢噚日就相當風騷，成個大班咁，拖住32位嚟自世界各地、衣着性感嘅索女，為旗下樓盤做宣傳，唔知仲以為佢搞緊環球小姐選舉，出位之極。
呢個樓盤係由卓能地產發展嘅荃灣新盤一號九龍山頂，雖然位處荃灣，但十足半山豪宅咁sell，除咗喺現樓搞咗個記招，講幾句物業銷售部署，仲好大陣仗咁，搞咗個比堅尼女郎選舉，請咗32位嚟自世界各地不同國籍嘅靚女行天橋，有森巴女郎、㗎妹同坡妹。
10萬美金合約做代言人
可能噚日天氣凍，比堅尼華華就睇唔到，不過，個個索女都拋胸上陣，同場男士睇到熱血沸騰，難為班索女就凍到震。點解呢班比堅尼女郎咁落力？原來邊個能夠勝出，就可以贏得一份價值10萬美金嘅合約，成為呢個樓盤未來一年嘅代言人。
睇完女，心情絕靚嘅趙世曾仲親自帶隊，帶傳媒上示範單位參觀，仲介紹一幅桃花畫，呢幅畫有來頭㗎，話係唐伯虎真迹，趙世曾仲話呢幅畫好襯佢，好似佢一世咁有桃花運，一生做人都咁開心。
發展商愛攬女推盤
識得搵靚女model賣樓，喺香港地產界梗唔只一個趙世曾。華華隨口數得出幾個，好似盈大地產（432）李智康咁，華華記得，7年前佢未過檔幫小小超李澤楷，仲喺信置（083）打工時，佢推售大角嘴柏景灣個盤，就搵咗今日已貴為香港股神李四叔新抱仔嘅徐子淇嚟sell盤，你話佢幾有眼光呢！
家陣李智康喺盈大，有小小超咁大條水喉射住，水頭充足，自然可以搵更多靚女，華華聽聞，佢好鍾意搵本地名模，好似sell薄扶林豪宅貝沙灣，就搵咗唔少名模嚟谷盤，好似楊崢、陳嘉容、李嘉慧同歐陽妙芝等靚女。
另外，會德豐地產（049）黃光耀幾乎每次推盤，都有靚女撐場，今年賣深井碧堤半島嘅貨尾，就有個鬼火咁靚嘅鬼妹model，而前年就挾住兩個水着少女。橋唔怕舊，最緊要受，靚女賣樓，點睇都係最多人鍾意。
電郵：mailto:[email protected]
