近排電訊寃家，王維基嘅香港寬頻同李澤楷嘅電訊盈科（008），喺廣告宣傳互鬥，好似呢兩日，香港寬頻嘅漫畫廣告，擺到明取笑對家光纖繞地球26轉嘅言論，漫畫人物嗰句「搵勻全屋都無（光纖），牙籤就搵到條！」簡直寸盡對家。
噚日，城市電訊（1137）出咗最新年報，延續旗下香港寬頻嘅玩嘢風格，唔放過追住對家嚟打，開宗明義話「把一切變為有可能」，揚言「於2016年，將成為全港最大的新一代網絡供應商」，唔止咁，仲要「體驗競爭、勝利和擊垮對手的感覺」，王維基講得出要做得到噃，唔知對家見到咁挑釁嘅叫喊，有乜回應？
度橋咁出位，但王維基呢個主席07年度收到嘅董事酬金843.7萬銀，比前一年跌咗2%，不過，佢其實有加薪，人工加咗3.3%，去到605.1萬銀，只不過花紅冇變，用股份支付嘅酬金就少咗。