自從上季以年輕型男做賣點嘅日劇《花樣少年少女》大收旺場後，日本各大電視台喺明年1月播映嘅冬季檔期，都爭相開拍以靚仔男星掛帥嘅劇集。連番收視仆直嘅組合KAT-TUN成員龜梨和也，將會夥女星黑木美沙，演出改編同名漫畫嘅劇集《一磅的福音》博翻身，可惜劇集未播，已經俾當地網友睇死。
「睇厭SMAP」
網友O話：「阿龜逢劇必仆，仲擔正？」網友A就彈阿龜來來去去只得一款演技。不過，網友無名氏就為阿龜講好說話：「佢只係冇遇到好劇本啫。」
同屬尊尼事務所嘅師兄、SMAP成員香取慎吾亦會主演來季「月九」重頭劇《沒有玫瑰的花店》。不過，一向形象搞笑嘅佢轉型拍愛情劇，網友一樣唔多受落，網友sara話：「已經睇厭SMAP，冇晒新鮮感。」網友KIKI就話：「香取已經30歲，仲拍愛情劇，而野島伸司嘅劇本，睇怕會好悶。」反而憑《花樣少年少女》人氣爆燈嘅小栗旬，喺新劇《貧乏男子》扮窮苦大學生，就最受網友支持，連阿Deep都好睇好佢。
版主：網盜王尊尼Deep
本欄逢周一至五刊出
網址：
http://idolgravuredvd.seesaa.net/article/69138753.html#more