六、七十年代,可以話係最夢幻嘅年代!飲完嘅波子汽水,內裏的波子可以攞出嚟玩;街角士多水櫃機底嘅汽水蓋,搥扁後可以做「風車鋸」或搖鈴。𠵱家嘅人物質豐盛咗,又或易拉蓋決定咗我哋(汽水罐)「二奶仔」宿命,飲完嘅空罐,只會掉落垃圾桶或環保箱,唔通我哋真係咁冇用?
記者:朱崇德
攝影:黃子偉
阿婆踩罐 1毫子個
𠵱家嘅後生仔唔知汽水罐嘅用處,你可去旺角街頭搵個踩罐阿婆問,佢會答:「以前收汽水罐嘅廢物回收店通街都係,多到似米舖;𠵱家少咗好多,要走到落深水埗、大角嘴先賣到價!」
當維他奶樽都唔使再「按樽」,飲完叫你掉落垃圾桶嘅年頭,大家有冇諗過一個汽水罐值幾錢?老懷安慰!原來每個都值1毫子,阿婆執到三、五十個就買到個麵包,二百多個仲可以食餐飯,盞鬼嘛?
球形掛燈
一般穿罐底,好多人都會聯想起超過2焦耳嘅氣槍,不過今日唔係教大家犯法;汽水罐底鋁料較厚又夠硬淨,所以最適合用作做燈飾,就算遇上燈泡的熱力都冇咁易變形。
材料
汽水罐底12個、燈膽連燈座1個、模型油4色、鐵線少許
製作時間:45分鐘
價錢:$70
Steps
小秘技
絕對要留意罐邊磨口步驟,因為罐身厚而鋒利,好易割傷手,一定要份外小心。
鐵皮×積木相架
呢個年頭嘅鐵皮玩具可以話屬高尚品味,過百上千才得一隻!今次教大家以可樂罐製鐵皮相架,感覺懷舊又有特色,製作簡易,積木所用嘅鐵皮,可以用罐底燈飾用剩的物料做,包唔浪費。
材料
汽水罐6個、木製三腳架1個、吉之島$10店積木12塊、㩒釘少許、熱溶膠槍1支
製作時間:20分鐘
價錢:$25
Steps
小秘技
留意step1的開料步驟,一個罐只可開兩塊,鐵片中間部份就是相架框的圖案,想砌出來的相架圖案美觀,就要在這兒預位。
啤酒巨罐座枱鐘
最近逛家具店,見到新出的汽水啤酒罐形CD架、雪櫃,放喺屋企潮到爆。不過講到尾都只係做個樣,點都唔及呢個啤酒鐘,真係以飲剩嘅罐嚟做,100%超真實。
材料
1公升裝鋁罐1個、鐘肉1個、時鐘針1包
製作時間:15分鐘
價錢:$20
Steps
小秘技
除咗可以用舊鐘拆下鐘肉做啤酒鐘外,在吉之島$10店都有DIY配件發售。