28/11/07
天晴
最新動態
香港人好喜歡話人揸流攤，早前股市暢旺，無論打工仔或者大學生都不乏此類人，但大前提係你有幾多本錢喺手，一經被發現，小心沒有好下場。
翻看英格蘭慘負克羅地亞嗰11位出場嘅正選，赫然發現佢哋所屬球會全部喺過去周末聯賽贏波，包括愛華頓、維拉同利物浦齊大炒對手；相信好多波友亦會聯想，呢班周薪分分鐘（5萬鎊計）多過絕大部份本港打工仔年薪嘅球星們，喺嗰場波未盡全力，當中卡臣兄更為維拉作客米堡力保不失。但衰得過擔住把遮、喺場邊驚淋親幾條毛嘅麥帥咩？抵炒！
踢英超唔同踢太公波，點敢揸流攤，睇吓暑假來港匯合利記大軍嘅基維爾就知；不過想跳槽者例外，熱刺箭頭貝碧托夫對上一個聯賽入波已經係10月1日對維拉，不過佢得26歲，梗係諗住自己大把世界，仲可以有恃無恐，但當你年屆30時，又會點諗？
我最尊重仲係謝拉特，場場踢足，攔截去盡，射波腳腳七注，今晚生死戰對波圖，紅軍值得捧場！
蘋果波神
股市大旺，英超盛世，大家齊來贏多啲！
http://hk.myblog.yahoo.com/footballexperts/
逢周一至五見報