周汶錡與鄭希怡（Yumiko）將合作為東華籌款表演飛車飄移，周汶錡先辣火頭，寸Yumiko去年甩褲上港聞。寃家路窄，前晚兩女在中環一活動中碰頭，周汶錡大方肯影合照，被踢爆臨時請來的Yumiko，扭計霸住電梯三分鐘不肯出現，之後匆匆尷尬合照完，一臉委屈走人。
周汶錡早前當眾笑鄭希怡去年為東華籌款表演空中飛人甩褲，Yumiko之前表示不介意，前晚二人在中環新蒲場BeijingClub開幕上碰頭，合照過程既匆忙又尷尬。其他出席者包括吳佩慈、LisaS.、官恩娜、陳見飛和鈴木仁等。
未碰面好大方
Yumiko原先不在名單中，9時45分她與關智斌忽然出現，問Yumiko可是臨時通知？她直認說：「係噚晚公司叫我嚟，我啱啱練完飄移。」記者講笑指她臨時飄移？她即笑說：「我係由髮型屋飄移嚟呢度。」問她可知周汶錡也會出席，她有點愕然說：「係咩？我唔知佢喺度。」可覺被擺上枱？她說：「大家同行，過兩日都合作，我冇所謂，今日見唔到，遲啲都見，希望可以一齊做rehearsal，我唔會怪佢，飄移好危險，想集中精神。」隨即上樓入場。
匿電梯三分鐘
半小時後，周汶錡到場，即時被大會公關要求她與Yumiko合照，她初時扭擰，後來才點頭同意。大會轉為請Yumiko落樓，但Yumiko在電梯內扭計扭足三分鐘，更明言：「我唔影合照！」公關則堅持事前已知會她的經理人，Yumiko惟有一臉委屈，不情願地行出電梯、行埋佈景板，見周汶錡仍未就位，隨即走人，直行出門口等車，但車又不在，她只好返回佈景板。
Yumiko與周汶錡合照時，尷尬得滿臉通紅，十分委屈，見慣世面的周汶錡則神態自若，拍完照後更微笑向Yumiko揮手道別。周汶錡之後說：「成件事嘅安排，我由始至終係唔知，唔緊要，咪當幫飄移宣傳囉，多啲noise，多人留意，籌多啲錢。」
採訪：RitaLeung
攝影：RickyChan
