未來英格蘭領隊人選好似近期香港股市咁難捉摸，今日可以升1,000點，聽日可以跌番900點。繼卡比路、雲高爾之後，前車路士領隊摩連奴突然又話「試吓嚟搵我啦！」連費Sir都話最適合係摩連奴，都唔知佢係真心定係假意。
「人哋都冇話要我，我點方便講嘢呢？叫英足總搵我啦！大家拭目以待，我唔排除任何可能性。」之前傳冇興趣教英軍嘅摩佬，前日開腔送秋波。最奇怪嘅係，連仇家曼聯領隊費格遜都話摩佬係最適合人選，呢吓真係好似四叔叫人入市咁，搞到我求大俠一時間都唔知入好定沽好！
卜比笠臣都話適合
即管又聽吓費Sir咩理由先，佢話：「球會領隊致力發揮球員所有潛能，國家隊領隊最緊要識得刺激士氣，如果英足總請教我嘅話，我會揀摩連奴。」卜比笠臣都話以外國領隊來講，摩連奴係最合適嘅人選；既然老卜同老費都咁講，斷估唔會係山埃貼士啩！
根據英國《太陽報》調查顯示，有7成讀者支持摩連奴執教英格蘭國家隊。不過包拗頸嘅求大俠持相反意見，點解？因為摩佬同英超4大球隊嘅領隊關係差，尤其同費Sir嘅積怨更加深！加埋國家隊同球會對球員徵召問題，一向都係面阻阻，到時咪盞攞嚟搞？
舉個好簡單嘅例子，第日摩連奴國際賽選晒紅魔兵入隊踢殘晒，你估費格遜會唔會笑笑口話好呢？同樣，如果費格遜每次國家隊選人前，將夏格維斯、朗尼、里奧費廸南擺晒入傷兵名單，唔通到時英足總又派人逐個驗傷？所以話，費Sir今次撐昔日仇家係惺惺相惜，抑或另有原因，就由看官判斷。