飲食版記者並非專業食家，身邊的豬朋或讀者，間中會彈小記的食評寫到曉飛，試落水準不過一般。既然如此，介紹大家品嚐「最佳全能中菜廚師」的手勢，連一眾著名食家及經驗廚師都食到舔舔脷，各式佳餚有金牌撐腰，食得過！一定好揦脷？最低消費$68，最貴的全包宴只需$450，老饕你實畀得起！
記者：盧家蕙
攝影：伍慶泉
中西合璧全豆腐宴
榮獲「最佳全能中菜廚師──至高榮譽金獎」的亮明居行政總廚邵德龍師傅，出生於四川重慶，一直醉心鑽研家鄉的飲食文化及烹調技巧外，對其他中國菜及西方廚藝亦甚有研究，得獎菜式既保留傳統川菜的神韻，亦表現了追求健康、時尚的風格。
在廿多年的烹飪生涯中，他曾到重慶、菲律賓、沙地阿拉伯、印度等地，將四川菜發揚光大。01至06年間，出任香港中華廚藝學院的總教導員，努力培養新一代廚務專才，多年來積極推動中港台三地的廚藝發展。他並為中華人民共和國中式烹調高級技師、香港中廚師協會理事、香港學術評審局行業專家成員等。此外，於第五屆世界烹飪大賽，他分別獲得展檯賽冠軍、個人賽亞軍和團隊賽亞軍，表現出色。
魚香安格斯牛柳粒配脆皮豆腐
安格斯牛柳跟四川魚香汁的新奇配搭，蒜葱味突出，酸甜中帶點微辣，脆皮豆腐由蛋白、魚茸混成，炸香後切件，外脆內軟。
蟹肉沙律伴雪菜豆腐
黑芝麻冷豆腐，伴以充滿北方風味的雪菜茸，清新獨特；以新鮮花蟹、木瓜、芒果、亁葱等製成的沙律，中西合璧，零舍醒神。
石上金龍配亁貝豆腐伴黃燜汁
石斑魚跟蟹子蝦膠，鮮味四溢，黃燜汁是傳統的北方芡汁，以甘笋、亁貝及濃湯煮成，最後抽出亁貝，釀入鮮豆腐中，比釀節瓜更香滑。
素燕雞豆花
把雞胸及蛋白攪碎後撞入熱湯之中，使其凝固成豆腐般，配香濃上湯，味道清香，素燕以冬瓜絲製成，以假亂真，贏得評判的讚賞。
豆腐芝士餅
香濃幼滑的芝士餅，豆腐味濃郁，跟芝士味配合得宜，不會太甜膩，好頭好尾。
亮明居（23933933）
地址：中環國際金融中心商場三樓3101店
大賞菜式套餐每位$450（另設加一服務費）
經濟實惠得獎菜
美心集團的「八喜」以價廉物美見稱，一向深受藍田街坊及識途老馬歡迎，皆因有低調的莫亁安師傅坐鎮，入行27年，擅長小炒及海鮮，曾以龍闖鳳閣菜式奪得2003美食之最至高榮譽金獎（炒麵組）。其實早於4年前，莫師傅已獲2003美食之最至高榮譽金獎，事隔4年後再度奪魁，除了實力獲得認同外，亦有機會再次代表香港宣揚中華飲食文化，感到非常榮幸。莫師傅說：「我抽中尾籤（第6位）獻技，食材早被其他參賽者用得七七八八，不過就多啲時間預備，惟有見乜煮乜啦！」莫師傅說當評判問做乜唔去雞皮，他回答「雞皮好有營養價值」，其實心裏盤算着：「得番兩隻雞用，準備畀兩圍人食，仲去埋皮的話，一定好細件，唔得體，冇肉食。」雖感無奈，然而憑藉食腦功力深厚，終在有限的食材中突圍而出，非常可喜。現時推出了得獎菜式，食客更是滔滔不絕，要食趁早！
鳳凰展翅襯金衣$98
以原隻鮮雞去骨取肉製成雞卷，伴以香甜芒果汁，配搭新鮮，是開胃健康的冷盤前菜。
雪湖雙影維港照$88
混入蟹粉、瑤柱、甘笋汁精心炮製的南瓜湯，營養豐富，賣相吸引，甘香可口。
歲月流金翠白玉$68
以巧手片出的豆腐薄片，釀入彈牙的蝦膠再製成豆腐餃子，加上素蟹粉及蛋白調配的芡汁，食味更濃郁，既考創意，又顯刀工的精美餃子，大受食客歡迎。
八喜（27179738）
地址：藍田啓田商場2樓206號舖
寓意十足唱好香港
香港日航酒店桃李中菜廳大廚劉錦佳，憑穩紮的廚藝及無窮創意勇奪「最佳全能中菜廚師」金獎，成績斐然。由即日起推出「金獎美饌套餐」，每位$320（兩位起及必須於一天前預訂）。這三餸一湯的心血精華，集色、香、味於一身，賣相精緻，創意非凡。而「金獎美饌套餐」更加入了鮮蝦雲吞稻庭麵及凍香芒布甸，錦上添花，菜式名稱十足煙花一樣，款款有寓意，師傅拎鑊鏟之餘，仲要有文采。
四海昇平
拼盤分別是香檸凍斑球、冰鎮凉瓜條、香麻蜜餞脆豬柳及四川蝦球豆腐杯，象徵港人所經歷的甜酸苦辣。
繽紛耀香江
菜名帶點幻彩詠香江Feel，錦繡素丁炒和牛粒，牛肉味濃郁煙韌。
乘風破浪
星斑球燴冬瓜伴翠瓜蟹箝，東洋壽司的外形很省鏡，海鮮跟瓜菜配搭異常清爽。
金玉奇緣
金湯海鮮豆腐羮，南瓜湯加入各式海鮮，比喻香港永遠歌舞昇平。
桃李中菜廳（23134225）
地址：九龍尖東麼地道72號香港日航酒店2樓
金獎美饌套餐每位$320（兩位起及必須於一天前預訂）
美食之最大賞係乜？
香港旅遊發展局主辦的「美食之最大賞」，目的是向世界各地旅客推介香港的美食，並表揚優質食府，鞏固香港「亞洲美食之都」的地位。要參加比賽，大廚先經過嚴謹的筆試及面試，躋身六強的參加者在最後一關則須考驗烹調經驗及臨場反應，故主辦單位於總決賽當日才揭曉神秘食材（今屆主題是豆腐），各人須於一小時內即場撰寫三餸一湯之菜譜（其中一道必須包括豆腐），從食味、心思、造型等花盡心思，完成菜譜後須於三個半小時內完成烹調，供評判團（當中包括著名食家及經驗廚師）試食及評分。
