橙汁槍靠紅外線<br>高清開戰贏硬

橙汁槍靠紅外線
高清開戰贏硬

早前剛講完Namco旗下大作投誠XBOX360，睇落似徹底背棄Sony陣營，其實《鐵拳》同《TimeCrisis》等都仲係PS獨有，或者分散投資先係21世紀生存之道。提早喺聖誕檔前上市嘅《TimeCrisis4》，玩法以街機做藍本，到底揀佢定係Wii嗰兩隻炒到飛起嘅槍戰？若有高清電視配合，《TC4》贏硬！

文：陳福榮

首支對應PS3「橙汁槍」

PS3都出咗成年，搵隻真係揸支槍過吓手癮嘅Game都冇，鬼咩一來對應唔番PS2甚至PS嘅Guncon，二來LCD電視根本行唔到舊有作品嘅畫面掃描技術，惟有靠啲美式FPS止咳。NBGI嘅Namco牌頭向來都有隻《TimeCrisis》歐美風行，第4集舊年都有出街機版，如今廠方終於克服LCD電視嘅接收問題，套用紅外線裝置即刻搞掂，咁就安坐家中享受呢款射擊勁作。
《TC4》初步試玩感覺幾好，有啲連街機都做唔到嘅地方都盡善盡美。令人遺憾係支專用槍Guncon3真係肉酸咗啲，呢隻橙色搞到原本已經硬膠嘅槍身變得更似玩具。

■雖然可以扮發哥雙槍在手，不過咁嘅色水又真係幾惡頂吓。

■唔止槍頭有孖掣同棍仔，連扳機後方都有，玩齊兩支棍。

■靠綁喺電視機左右兩角嘅接收器感應支槍。

■明明TGS嗰陣支黑槍幾好睇，有圖為證㗎。

單打街機全畫面Fit晒

今次PS3嘅畫面做得比街機仲要靚同精細，若然係用闊螢幕高清電視作720p以上輸出，臨場感真係唔講得笑，搞到個人會郁身郁勢去避彈㖭。雖然話只有三關，不過佢每關都會劃分為若干部份，有大佬打之餘當中又會出現些微變化，技術差啲可能打成年都爆唔到機。不過大家又唔使擔心，除咗每次開局時送多個Credit畀你，儲夠大量Credit仲可以校最多條命嚟玩。
另外，《TC4》係容許喺同一部電視分割左右兩邊同時進行，但喺16:9電視度都縮細就睇得勁辛苦，況且支槍暫時又冇得散賣，的確係幾令人難堪嘅情況。唔通叫個Friend仲用手掣陪我玩2Play咩！

■嫌「磚妮凸鋪」唔啱Feel，仲可以互換角色。

■16:9玩槍Game，有上下兩條黑邊有啲礙眼。

■班敵人唔算太難應付，睇準啲子彈閃開即可。

■着晒裝甲手執鋼斧衝埋嚟，嗱嗱聲開槍啦。

多重視域任務考反應

秉承住系列一貫邊行邊閃避嘅傳統，今集想前進就要按實左手食指粒A1掣，想幫支槍上彈或者避開敵方攻擊就要鬆開粒掣。比較過癮嘅版面設計，就係猶如中途考慮嘅多重視域任務，玩家同時兼顧2-3個畫面嘅戰況，假如被擊中並唔會即時死亡，只會當行動失敗拎唔到Bonus。如果想轉去其他畫面，只要將支槍指向電視左邊或右邊，咁主角就會自然擰去嗰面繼續開拖，但留意由於每個畫面嘅敵軍都會不停攻擊，如果能分配時間逐一擊破就成為過關嘅關鍵。

■每關都要面對2-3個畫面構成嘅多重視域任務。

■製作人食錯藥，居然整埋啲核突昆蟲攻擊玩家。

■揸無限彈重機槍辣直升機？當正自己Rambo！

■射靶模式純粹畀玩家練眼界，遊戲性唔高。

新增FPS有如雞肋

如果PS3版《TC4》齋得唔使一粒鐘就爆到機嘅街機模式，咁就真係搵鬼用六嚿幾水托返屋企咯！而且據聞香港代理暫時無意引入單Game版本，連齋賣支槍都唔多想，咁嘅話點都要加番啲原創模式先似樣。結果今集新設咗由平時負責從旁支援嘅大隻佬Rush做主角，用盡支槍左右兩支棍仔嘅GunconFPSMode，玩法唔再係自由度較低、喺限定時間內強制移動兼盡殺敵人，而係好似普遍PC主觀射擊咁自己搞掂前進後退與轉換視點。聽落好似幾好玩咁，不過唔知係咪冇乜資源去開發，變成場景空洞敵人出場位置又固定，同街機模式差天共地。如果閣下要求唔高，平時又唔係成日玩PCGame，呢個模式查實又唔係差到好離譜嘅。

■除咗手槍仲有得揀散彈槍或手榴彈等，但千祈咪亂啡慳住彈用喎。

■軍刀近距離效果一流，不過缺點係要走到好近先劈得中。

■按前面「左的」蹲下慢行，雖可捐車底但容易被人伏擊。

Profile

機種：PS3
廠商：NBGI
類型：STG
人數：1-2人
日期：已推出
價格：$628（光碟連槍）

■連埋40GB白機成Set買，用嚟提早慶祝聖誕都幾盞。