與馬主W在四季酒店龍景軒食飯，無所不談，講吓講吓，發覺附近有一位白髮男士，樣子好熟，但一時之間唔記得佢係邊個，叫馬主W望吓，馬主W初時話係日本人，再睇真啲，馬主W話：「與白髮男士同枱吃飯之女士，打扮雍容得體，好似係江素惠。」一經提醒，個貌似江素惠女士隔籬之白髮男士，貌似台灣聯華電子榮譽主席，最近與陳水扁罵戰之曹興誠。
估人哋係邊個，無甚意思，馬主W話不如估明年鼠年有乜嘢好投資。原來馬主W以前做樓宇設計，學過吓風水，隨口噏得出金生水、水生木、木生火，左丁山大笑，話不如學李四叔，買股講金木水火土，四叔話佢買入金、火類股，土股（地產）暫勿沾手，水木股不評論，沿四叔思路，諗落去可也。
馬主W話四叔係股神，佢講得出，我哋未必學得到。另一位股神陸東喺十一月十八日嘅投資研討會話：「唔係三、四、五、六叔話幾多就值幾多。」又話：「指數唔係有斷估，冇痛苦，我比較鍾意計數！」計數又如何？今時今日之股市，斷估與計數，冇乜分別咋喎，恒生指數一日波幅過千點，最識計數之基金經理都俾市場玩殘，基金F就話畀左丁山聽，佢買入大藍籌新鴻基地產，竟然因波幅太大而冇法子對冲，係前所未見之事。
斷估又好，計數又好，青姐叫左丁山留意十二月一日九龍香格里拉有一個投資講座，叫做「鼠年投資天機」，佢與浸大麥教授做講股嘉賓，主力係楊天命講戊子年鼠年嘅天時（整體投資八運）、地利（市況形勢）與人和（散戶命格），如何部署投資策略；沈大師（振盈）講金股滙。散戶代表田啓文（田雞）講散戶心聲。如此講者配搭，甚為少有，由走勢技術分析講到鼠年風水財運，以至為聽眾測算流年投資運程，果然招數多多。呢類投資講座，個個星期都有，奉旨爆棚，撲飛（唔收錢）十分困難，足證散戶對買股票嘅興趣，非常濃厚。