我求大俠鍾意睇戲睇波，所以幾仰慕兩類法國人，一種係足球員，另一種就係的士司機嘞！相信大家都睇過《極速的士》呢套戲，男主角講嘢一輪嘴、手車更係出神入化，「做戲啫，邊有咁勁？」大家問下車路士嘅法國中場馬隆達就知！
話說馬隆達上月17日回國參加歐國外對立陶宛，賽後里昂、阿仙奴球員都有專機接返球會，反而最有錢嘅車仔竟然冇派機接馬隆達返倫敦。原本佢打算坐阿仙奴架專機點知爆棚，結果半夜由西部城市南特「飛的」去北部巴黎，沿途經過鄉村小巷，搞到雞飛狗走、人畜不寧。
瞓3粒鐘即要操練
結果馬隆達搭正凌晨4點半去到巴黎機場，啱啱趕及坐頭班機去倫敦，返屋企瞓3粒鐘就參加車仔操練課。馬隆達諗番起仲係一肚氣：「我肯定如果舒夫真高喺法國打波嘅話，球會一定咩都安排好晒！」其實，大球會成日都大細超㗎啦，鬼叫你唔係超級球星咩？
不過，我求大俠成日坐亡命小巴入屯門，都好明白半夜俾架車拋來掟去嘅滋味，仲要見到其他隊友享受皇帝級待遇就更火滾。好似周一晚預備組賽事上陣嘅波歷克，之前因傷唞咗7個月，期間一邊傷一邊四處飛，仲要攞最高人工。所以馬隆達有乜理由唔嬲？
如果車仔要成為真正嘅大球會，就要協調好同球員嘅關係，老細阿巴莫域治大把私人飛機擺喺機場晒日光浴，點解唔派出去接球員？連里昂都做得到，唔通佢哋連法甲球會都比唔上？咁嘅企業管理同大細超文化，唔怪得G14都唔肯預埋車仔玩啦！