混血名模Rosemary同外籍男友Christopher拍拖年半，一時糖黐豆、一時水溝油，分手復合嘅次數，用計數機都幾乎計唔到，前晚佢兩個又突然黐埋夜半玩狗，之後仲齊齊上咗中環伊利近街嘅一幢唐樓過夜㖭。
幫男友孭背囊
前晚Rosemary先單拖出席喺中環舉行嘅《Baccarat》雜誌派對，到咗凌晨12點，Rosemary同Christopher前後腳喺一幢唐樓度出現，後者先拖住兩隻狗出街，但兩隻狗並唔係大小便，原來係同主人玩波波，Christopher不停掟網球，同狗仔追嚟追去；冇耐身穿運動裝嘅Rosemary都嚟埋，佢邊行邊紮起頭髮，加入玩波行列，倆口子玩得鬼咁開心，前後玩足半個鐘，最後由Rosemary幫男友孭背囊上樓，一身汗嘅Christopher就拖狗尾隨返歸。
唐樓重建愛巢
其實Rosemary早排至自稱甩拖，同名模老友AnaR.以28,000蚊合租銅鑼灣百德新街嘅1,200呎單位，但相見好同住難，前者大爆同居姊妹有新男友，結果激嬲AnaR.而被趕離上址。點知轉頭Rosemary又瘟仔，同Christopher喺伊利近街築愛巢。之前Rosemary阿媽Julie成日話個女掛住拍拖猛講大話，真係事出有因㗎。