小記每年到此時都有點年尾抑鬱，因為多數要幫各方親戚好友趕及新年前搬屋入伙。每當問︰「點解唔畀搬屋公司賺吓呢？」答案總係︰「慳得就慳喇！請你食飯抵過畀貼士。」其實攞執屋嘅時間格吓價，揀間最抵嘅搬屋公司幫手都冇蝕啫，如果仲堅持親力親為，OK，代你請教埋時昌搬運公司嘅Mathew，教你DIY搬屋pack箱貼士。
記者：劉昱蘭
攝影：譚盈傑
鳴謝：時昌搬運公司（22433996）、GoHome
搬屋前準備工夫
如果係自己pack箱，就要睇清楚以下工作清單，仲要預備搬屋budget，咁就唔會有錯漏。
1.最好預1個月時間作搬屋準備工夫，通知新屋大廈管理處安排時間搬屋。
2.諗定電器傢俬擺位，執屋就可以慳好多時間。
3.確定新居無地方要補漏，因為搬屋後才補救費時失事。
4.傢俬要先做滅蟲工夫，確保唔會帶埋蛇蟲鼠蟻過去。
5.改地址cut水、電、電話等，大把form等你填。
蘇師傅幫你擇吉日
搬屋當然要揀吉日，以下係蘇民峰師傅畀出由今年農曆十一月開始，嚟緊半年嘅搬屋吉日，至於日曆寫住破日就不宜入伙喇。
網友齊選搬屋公司
搵搬屋公司，口碑好重要，網上討論區「親子王國」嘅「家事百科」內，討論搬屋嘅題目都幾hot，總結其中有5間被點名力讚嘅搬屋公司，仲即場幫你格吓價。
教你點包裝
晚晚喺電視見到個鬼佬口噏噏話：「搵時昌迷你倉幫手呀……」，既然咁pro，搬屋pack箱技巧無理由唔問佢㗎。擁有時昌迷你倉和時昌搬運公司嘅鬼佬Mathew教路，唔係所有嘢都要先入箱，衣物同雪櫃就有兩個偷懶大法。
1.衣物唔使逐件摺放入袋，有啲外褸、西裝或靚裙唔使摺，直接掛上流動衣架上面，用保鮮紙成個架包好，一次過推上車就最快捷。
2.雪櫃入面嘅食物唔使拎出嚟，只要拔走電源，成個雪櫃連食物搬走就得，因為車程遠極都係約一粒鐘，食物唔會咁快變壞，但雪糕除外。
3.AV同電腦要包好
Step1︰先用白報紙墊好箱底。
Step2︰用bubble紙包好大件電器。
Step3︰其餘電線或遙控等配件，先捲好再用尼龍繩綑好，用bubble紙包實。
Step4︰較重嘅物件放在紙箱底，輕嘅放上面，重嘢唔好放在同一紙箱內，每個紙箱不要超過20磅重。
4.易碎物要獨立隔開
Step1︰要先𠝹好紙皮，砌成紙皮格，放入紙箱。
Step2︰用報紙或軟墊包好易碎品，放入格中，記得喺箱外寫上「易碎輕放」。
寄存搵迷你倉
除了細屋搬大屋，有時家居裝修也要搬來搬去，還要搵個地方暫存物件，迷你倉都係好多人嘅選擇。但話明迷你倉地方唔大，點樣執個倉會見最慳位又保護到物件？
每月收費：約$9-$22/呎（視乎不同地區而定）
查詢：81777778（時昌）
存放貼士
1.大件物和大箱靠牆放，小物放邊，容易一覽倉內物件。
2.善用大件傢俬內的空間，如火爐，冰箱等內裏的空間大，可存放毛巾、毛氈等。
3.若要長久存放重要物件，倉內濕度雖控制在40-60%，但最好有埋抽濕機，防止發霉。
4.雖有24小時智能卡出入和閉路電視監察，不過都係喺門外加多把鎖穩陣啲。
提提你
作為消費者，一定要清楚搬屋公司包啲乜服務，最緊要咪俾人多收費用！
1.唔好亂畀Tips
好多公司都規定工人唔可以私下攞tips，如果工人真係好落力，10%貼士都好夠㗎喇。
2.紙箱多免費
好多公司都會送紙箱同封箱膠紙畀你pack濕碎嘢，十零廿個紙箱通常都唔收錢。
3.包還完服務
工人係有責任要幫你還原番啲傢俬，唔好搬完就畀佢收工，呢啲係你應享嘅服務。
4.搬多咗要通知
如果搬屋當日要搬嘅貨物比報價時多，一定要打電話同搬運公司講，咪私下畀錢等工人搞點，分分鐘charge多咗你都唔知呀。
