領匯上市搞到公屋商戶捱貴租、清潔工人冇啖好食，眾多受害者當中，郵政署署長譚榮邦應該係最抵死嗰個。譚榮邦噚日大吐苦水，話領匯旗下部份屋邨商場郵局最近續租傾新約，估唔到政府部門都冇面畀，領匯獅子開大口加租兩至六成。譚榮邦苦笑話捱貴租真係自食惡果，事關領匯上市時，佢係房署副署長，有份籌備領匯上市，今次現眼報。 臨近聖誕，譚榮邦最近飛咗去芬蘭公幹，順便將50封香港小朋友寫畀聖誕老人嘅信，親手交畀當地郵局嘅聖誕老人，聖誕老人話會盡快覆信喎。