成立53年嘅中華出入口商會係老牌愛國愛港機構，因一宗小意外令京官受驚，高層下令徹查事故，誓要元兇「人頭落地」！中出副會長、立法會議員黃定光同八方講，舊年11月中出喺德輔道中會址長達大廈宴請統戰部副部長等高官，席間賓主盡歡，點知散席後卻出事。
一眾京官搭𨋢落樓，點知部𨋢忽然唔生性，停咗喺二樓至地下之間，初時以為部老爺𨋢行得慢，點知越等越唔對路，原來部𨋢郁都唔郁停咗喺度。京官困𨋢半天吊，中出上下嚇到標汗，黃定光臨危不亂，親自打999報警。
香港警方效率甚高，黃定光話五分鐘後白車、消防車同時抵達，好快就救咗班京官出嚟。黃定光話京官脫險後冇怪責佢哋，反而大讚見識到香港人辦事嘅高效率。八方噚日見到長達大廈正進行換𨋢工程，呢部𨋢玩嘢嚇親京官，抵俾人「祭旗」啦。黃定光則話佢哋唔係咁絕情，聲言困𨋢事件發生前，大廈方面已計劃動用百幾萬元換咗兩部老爺𨋢，京官中招真係始料不及。