大埔股神噚日推介中海集運（2866），建議可以喺現價6.13蚊入貨，目標價11蚊，睇升八成，止蝕位定喺6蚊樓下。中海集運噚日低開3.7%，股價臨近中午一度反彈到6.34蚊，點知隨即掉頭回落，最後收6.13蚊，跌咗成6%。事實上，中集嘅股價由10月尾嘅10.88蚊歷史高位，一直反覆下挫，至今累積跌幅高達44%。
誠哥減持無有怕
自稱身穿火雲戰衣嘅大埔股神，之前投資中海集運有斬獲，「喺3個幾入貨，8、9蚊走人，賺咗一倍。」眼見𠵱家中海集運累跌超過四成，佢認為係吸納時機，「自己喺8蚊入貨，諗住佢嚟緊喺大陸A股上市，相信會刺激股價。」即使李嘉誠不斷減持手上嘅航運股亦唔怕。
太航PE較低可吼
黃敏碩表示：「反映航運費嘅波羅的海亁貨指數下跌，市場對鐵沙嘅需求亦有減少迹象，影響運費，加上經濟增長可能放緩，拖累航運股下跌。」佢又話：「中海集運發行A股，未必實升，仲要睇當時市場氣氛，中石油（857）上A股後，股價都不斷跌。」現時中海集運市盈率好高，達到67倍，將目標價定喺11蚊，市盈率將超過百倍，實在太樂觀，目標價調低到8至9蚊較穩陣。
孫柏文亦話：「即使中海集運大幅回落，股價全年仍然累積升成3.5倍，過去航運股嘅市盈率都係講緊個位數字，現價防守性好低，一跌起上嚟，可以好勁。」
黃敏碩補充：「如果大埔股神鍾情航運股，可考慮太平洋航運（2343），佢經營小靈便型亁散貨船，市盈率較低，只有21倍，13蚊價位可吼吓。」
中鐵（390）
拆有賺起又賺
北角Frankie推介新股中鐵（390），建議長揸，仲叫抽中嘅讀者可以喺8蚊先行止賺：「我知道佢有其他非核心業務，例如房地產、礦業，但無論如何，我始終主要睇好交通建設業務嘅前景。」
Frankie表示，中鐵貴為內地及亞洲最大嘅鐵路及建橋承建商，強項係鐵路運輸。孫柏文提出，內地係政策主導票價，中鐵未必有票價主導權。Frankie反指出，中鐵主要收入係基建，只要地方持續發展，交通基建就會不斷拆舊建新：「拆嘢佢有賺，起嘢佢又賺。」
黃敏碩亦都話，十一五作出對交通建設的投資額達1.25萬億美元嘅決定，故中鐵亦算有國策支持。
《買入價》
Frankie建議：— 專家回應：—
《目標價》
Frankie建議：8元 專家回應：—
《止蝕價》
Frankie建議：5.78元 專家回應：—
《時間》
Frankie建議：長揸
專家回應：建議現金認購，首日目標$7-7.5，中線持有睇$9
A50中國基金（2823）
贏四倍都擔心
跑馬地吳先生推介A50中國基金（2823），佢話自己上年八月已經買咗：「我57蚊到61蚊入左。」呢隻股現價22.05元，因為最近1拆10，計落吳先生5個幾時已入貨，賬面賺四倍有餘。不過佢仍然好擔心：「我覺得𠵱家唔值得買，就算放咗我都唔會再買，𠵱家個價太高，隻股曾經跌到得十幾蚊，但青姐叫我揸。」
黃敏碩建議：「其實內地A股去到250天平均線，如果有少少擔心，不妨先走一半，獲咗利先。但始終美國個市比較弱，而內地只係做緊一個整固，所以我對呢隻股有信心，可繼續持有。」
《買入價》
吳先生建議：$57 專家回應：—
《目標價》
吳先生建議：$300 專家回應：—
《止蝕價》
吳先生建議：沒有 專家回應：—
《時間》
吳先生建議：長揸
專家回應：可中長線持有，如欲套利，可先行減持一半
註：基金單位已由1拆10
今日嘉賓：訊匯證券董事總經理沈振盈
每日收市後4:30pm
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
歡迎Phonein28698262
＊以webcam參與節目者，可額外獲贈KFC$100現金券
