今年股樓齊旺，華華識得好多老友都賺到盤滿缽滿，臨近年尾，又到加人工嘅時候，唔少公司為咗挽留人才，都願意大幅加薪，講緊嘅係做得嘢嘅伙記，你知人才難搵。
樓市好景，兩大地產代理中原同美聯不約而同宣佈加人工，中原後勤員工明年加8%，跑贏負利率。聽佢哋嘅董事總經理黃偉雄講，今年公司盈利理想，10月佣金更創歷史新高，超過4億銀，而今年中原後勤部已經派咗兩個月特別花紅同1000蚊利是。
同系嘅利嘉閣當然亦有得加，180名後勤員工平均亦加薪8%，不過花紅就冇中原咁多，執行董事廖偉強就話，後勤員工今年收到一個半月花紅。
美聯追住中原嚟加
美聯物業（1200）見中原話加人工，噚晚亦漏夜宣佈加薪，仲吓吓啄住中原嚟打，話表現優良嘅後勤員工，明年加薪唔少過8%，老細要保住「飛士」，最高興自然係員工！執行董事林鳳芳話，公司今年已經6度派花紅同賞金，累積金額差唔多有成2.2個月人工。
美聯同系嘅香港置業亦唔執輸，行政總裁胡日發話，公司計劃全面調整後勤員工薪酬，表現超卓嘅員工，加薪唔少過8%，公司繼續彈性派花紅，做得好就有賞，今年已經派咗4次花紅同賞金。
喺噚日大快活（052）嘅業績記者會上，主席羅開揚亦話，員工平均加薪4至5%。新世界發展（017）純官鄭家純亦喺股東會後話，新世界一定會加人工，但加幾多仲未定，要睇吓市場薪酬趨勢喎。
除咗美聯中原兩大地產代理，唔少大企業一早都響晒口話市場求才若渴，要加薪留人。好似之前恒生（011）柯大俠柯清輝就話，銀行業今年整體員工流失率估計超過15%，而恒生今年員工流失率就有成12%，比舊年13至14%輕微回落，相信係由於員工薪酬福利即使有調整，都高過以往8至9%嘅水平。另外，滙豐（005）亞太區行政總裁霍嘉治話，佢哋會跟通脹調整工資。仲有新地（016）亦話明年會加人工，但幅度未定。各位老闆收到未!
電郵：mailto:[email protected]
僱主開水喉留人
今年樓股皆旺，華華成日喺網上討論區見到啲網友話，炒老細魷魚全職炒股。正係今時唔同往日，僱主要留人，梗要開水喉，雖然之前香港僱主聯會建議加薪2.5%，不過，先排香港總商會做咗個調查，訪問咗323家貿易、金融、製造業等多個行業嘅公司，有成四分之一受訪公司話明年加薪幅度會達5%至10%。
其實，有好多打工仔唔使等明年先有人工加，據人力資源機構翰威特諮詢公司調查，香港今年加薪幅度有3.6至4.5%。不過，呢個幅度同亞太其他地區比，都幾失禮，據翰威特嘅調查發現，亞太區今年以斯里蘭卡加薪幅度最勁，平均15.3%，印度同越南分別14.8%同10.3%，排第二同第三，至於祖國就排第四，平均加薪8.6%。
金牌經紀今年佣金過300萬
中原同美聯嘅後勤員工都加咁多人工，做前線嘅地產代理應該搵得仲多。美聯今年嘅金牌經紀係紅山半島分行高級客戶經理莊蕙殷（左圖），07年嘅營業額達2309萬銀，創集團兩年以嚟新高。
莊蕙殷話：「今年做到嘅生意有33宗，最高嘅成交金額係香島道33號嘅獨立屋，達2億銀，今年實際袋落袋嘅佣金約300萬。」佢仲話：「今年市場氣氛熱烈，唔少喺股市賺到嘅客人，都買樓投資或自住，即使最近股市跌，睇樓嘅人都冇少到，反而多咗。」她估計，明年獨立洋房升幅潛力最大，由於供應量少，相信有二至三成升幅。
中原嘅金牌經紀係羅便臣道明苑分行高級客戶經理譚永業（右圖），今年營業額達1000萬，譚永業話：「今年成交有30幾宗，受到減息刺激，11月做到嘅生意亦係今年最高，今年佣金收入至少有300萬。」
佢仲話：「唔少客人都有玩開股票，股市賺到，都套股買樓，除咗一圈（即一層）咁買，部份更連樓都唔睇，畀票即買。」他話會將賺到嘅佣金用嚟投資物業。
