兩鐵合併在即，兩鐵高層拍心口話二合一後運作唔會有問題，八方卻冇佢哋咁老定。之前港鐵新制服被踢爆未着先甩色，噚日再有員工指新員工證都有問題。兩鐵噚日起向過渡去港鐵職員派新員工證，有人一睇就發現唔妥，原來證件有效期個英文串錯字，將Valid串錯為Vaild，報料員工指咁大間上市公司都唔小心，好醜怪。
地鐵發言人證實全體萬幾名員工新員工證都出錯，覆查後發現原稿正確，相信係製作程序出問題，已同印製員工證嘅八達通公司商討，稍後逐一更正，使多幾多錢暫時唔知。發言人話串錯字唔影響員工證操作，所以唔使即時全體換證。