郭富城開騷，對待兩位新歡舊愛熊黛林和藤原紀香卻大細超，前晚暴瘦10磅的城城舉行尾場騷後即到紅磡慶功，宣佈明年初再斬四両，開個唱延續篇，其後更自爆紀香是其圈中最好朋友，但一提熊黛林竟裝儍說：「邊個呷醋？我身邊啲朋友個個都好大方！」做天王情人不准呷醋，熊黛林收到未？
日籍女星藤原紀香大前晚到紅館欣賞舊愛郭富城演唱會，處處獲得厚待；現任城嫂熊黛林前晚再睇城城尾場騷，繼續備受冷落。但當城城在台上表演勁歌熱舞時，她也站起身邊笑邊跳，表現興奮，似未對大細超待遇感介懷。
明年初再開騷
城城一連九場的「舞林正傳」演唱會前晚圓滿結束，在觀眾安哥下，他再出場獻唱《忘不了》、《對你愛不完》和《臨行》，至11時55分超時完騷，被場館罰款70,000元。
其後城城拉隊到紅磡海逸酒店舉行慶功宴，暴瘦10磅的他表示將赴台灣出席金馬獎頒獎禮及舉行巡迴演唱會，明年初則在港舉行個唱延續篇，暫時未定場地。對於紀香專程來港睇騷，城城說：「開心㗎，佢專登飛過嚟支持自己，一路都同佢keep住聯絡，娛樂圈嚟講，幕前最好嘅朋友係佢，好難得，同紀香處身唔同地方都可以建立友誼。」
城城又稱知道熊黛林再度捧場，問城城會否擔心她呷醋？他即裝儍說：「吓？唔好講到咁遠，邊個呷醋呀？fans呀？我身邊啲朋友個個都好大方。」
黛林冇份探班
但紀香受厚待，熊黛林卻未被安排往後台探班，他對此說：「今次演唱會大家都好緊張，小美唔想人騷擾我，好多朋友想嚟後台探我，佢怕影響我；紀香係小美朋友，佢探我之餘探埋小美，大家無謂揣測。」
城城透露紀香稱讚其個唱是「wonderfulshow」，因她從未見過360度的轉動舞台，感覺很好。城城又謂對緋聞成焦點難以控制，他說：「我唔mind呢樣嘢，觀眾眼睛睇到我表演，唔係只睇到緋聞。」
採訪：胡比
攝影：陳順禎