杜琪峯跟韋家輝這對最佳拍檔，四年前各自發展，多事者就聯想到《無間道》的劉偉強及麥兆輝事件再次發生。以為從此以後，兩人的電影要在影碟裏面重溫，不過世事往往出人意表，他們的新作《神探》宣告面世，令我等杜、韋配的死硬fans可以鬆一口氣，又是時候買飛入場睇戲。撰文：何永寧
《杜琪峯拍得辛苦》
埋單計數，杜琪峯跟韋家輝這對最佳拍檔自銀河映象成立拍電影以來的11年間，先後製作出不少令人回味的電影：《孤男寡女》、《瘦身男女》、《我左眼見到鬼》和《大隻佬》等。但自《大隻佬》之後兩人開始各自發展，不過分久必合，10年磨劍後兩人再走在一起，炮製出來的電影《神探》，確實令人期待。兩人也借機細說當年各自發展的原因。
佩服編劇功力
杜琪峯的答案保持一貫敢言直接的作風，他笑說：「我覺得呢次係韋家輝有心整蠱，明明《神探》劇本角色得幾個，搞到有幾十人出嚟。原因係佢將隱藏心底嘅心魔用真人表現出嚟，好似家棟嘅角色有成七個心魔，出一出場就變咗成八個人，睇戲嘅就易明，拍嗰個我咪辛苦囉。不過個古仔都唔係一般觀眾跟得到，都要花啲時間思考吓。」對於自《大隻佬》後便分道揚鑣，阿杜笑言無合作並不代表意見不合，只是一般人將事情看成非黑即白般簡單，他笑說：「其實我哋成日見面飲酒食飯傾偈，我做劇本時都有搵佢問意見，所以完全冇分開嘅感覺。對於創作嘅本領，自電台起我已經對佢甘拜下風，我敢話韋家輝嘅創作係圈中嘅No.1。」
必須經歷低潮
但各自發展後，兩人的成就似乎越走越遠，杜琪峯向着荷李活及奧斯卡頒獎禮逐步邁進，但韋家輝所拍的賀歲片成績只是一般，身為好朋友杜琪峯就有另類看法，他說：「你話冇咁好睇冇咁精采咩，我又覺得唔係，賀歲片熱熱鬧鬧已經夠，可能佢係韋家輝啲人對佢嘅要求高啲又話唔定。其實我成日都講套片拍完出嚟反應係好同唔好都唔緊要，因為呢個只不過係一個過程，每個導演都會經歷，我何嘗唔係拍過《開心鬼撞鬼》同《7年之癢》呢啲片？所以𠵱家拍得唔好唔代表永遠都會停留喺度，我始終相信韋家輝會係一個好出色嘅導演。」
引爆化學作用
杜琪峯覺得韋家輝的長處在於故事結構縝密，人物性格描寫細緻，也是唯一在創作上他不敢批評的編劇。他補充說：「係咪最佳拍檔我唔敢講，不過肯定有好多化學作用，好多你未試過，唔敢試嘅佢都會要你去試。」
《韋家輝不斷求變》
韋家輝一向精於編劇，無綫電視時代最膾炙人口的創作莫過於《大時代》掉一班仔落街的丁蟹鄭少秋。不過近年最有興趣的還是想知道當年跟阿杜分開發展的原因，他說：「其實停留喺某一階段對創作人嚟講係一個噩夢，適當嘅時候要尋求改變，四年後今日合作又係另一個改變。對於外界傳聞我同阿杜意見不合係大家諗得太多，我哋當時構思公司裏面仲有一班手足，好似羅永昌同游乃海作為接班人，係時候放手畀佢哋去試。」
享受天馬行空
不過韋家輝分開發展的這幾年，獨自執導的電影《最愛女人購物狂》、《喜馬拉亞星》及《鬼馬狂想曲》，都沒有跟阿杜合作時那樣輝煌，令人懷疑他的能力，是否沒有了對方便不成，韋家輝大方地說：「毫無疑問，阿杜係一個好出色、好有個人風格嘅導演。作為生意，呢幾部電影我覺得都完成咗責任同任務，票房都唔差。」韋家輝坦言多得老闆向華強的信任，令他能夠放手創作，他說：「打工唔同自己公司，有啲老闆未必鍾意太天馬行空嘅諗法，因為未必夠商業，呢方面向先生畀嘅自由度好大。」
有堅持有讓步
事實上，韋家輝的作品都充斥着禪理的說教意味，言之有物，未必是普羅大眾懂得欣賞。新作《神探》亦是探討人的心魔，會否擔心曲高和寡？他笑說：「細細個我就好鍾意諗嘢，到大咗都喜歡讀一啲宗教書本，多多少少呢啲思想同構思都反映喺我嘅作品裏面。《神探》呢部係商業片，我只不過借心魔呢樣嘢做題材。」他表示每個人都有心魔，問題是當人的意志轉弱時心魔便會得逞，他舉例說：「前兩年我戒煙，戒嘅過程其實唔難，難嘅係你嘅心癮，呢樣嘢就係你嘅心魔。不過要好似片裏面林家棟咁有成七個心魔就確係幾少見。」
對於身邊的杜琪峯，韋家輝表示兩人的合作始於無綫電視年代，他說：「喺TVB時代我哋合作過一部《天堂血淚》嘅電視電影，之後佢叫我不如出去搞電影公司，阿杜好想有自己嘅電影公司，可能呢個係佢心魔。96年就成立咗銀河跟住到𠵱家。」他續說：「其實我哋合作唔會有太多衝突，只要一方堅持另一方都會尊重。大不了拍晒兩個版本出嚟，記憶中係阿杜讓我多啲。」對於拍檔的評價，韋家輝大讚對方的影像別具一格，他說：「阿杜攞鏡頭嘅功力好高，駕馭演員嘅能力好強，令到電影有好強烈杜琪峯風格，而且唔係做到最好唔會收貨。」
攝影：陳俊強
雙導演制 合作無間
杜琪峯與韋家輝於96年組成銀河映象，炮製過不少為人津津樂道的作品，頭炮推出的《一個字頭的誕生》一鳴驚人，當時杜琪峯主要任導演，韋家輝則負責編劇，至99年開始銀河映象與中國星合作投資拍電影，兩人實行雙監製及雙導演制，並拍下多套電影（見附表），直至拍攝《大隻佬》後分道揚鑣，到去年銀河映象成立10周年，他們才再度攜手拍攝《神探》。
00年：《孤男寡女》、《辣手回春》
01年：《鍾無艷》、《瘦身男女》、《全職殺手》
02年：《嚦咕嚦咕新年財》、《我左眼見到鬼》
03年：《百年好合》、《向左走向右走》、《大隻佬》
06年：《神探》
