賭王何鴻燊呢排因為澳門北安客運碼頭營運權搞到好勞氣，但噚日係佢嘅86歲生日，點都應該會暫時息怒。人賀壽佢賀壽，賭王每年賀壽都特別忙，因為幾位太太輪住幫佢慶祝，佢亦一如往年，展開其壽宴三部曲。
第一部曲係返二太藍瓊纓嘅谷柏道大宅食飯；第二部曲係三太陳婉珍幫佢賀舊曆生日，即係下個禮拜六喺珍寶海鮮舫擺酒；lastbutnotleast，梗係四太梁安琪守尾門喺信德碼頭黃金閣擺酒。賭王行程依然好頻撲，生日酒都要成十日先飲得晒，都算巴閉。
同二太一家食晚飯
賭王噚日4點幾坐住「HK1」座駕出巡，首先去三太陳婉珍布力徑大宅休息三個鐘，夜晚就轉場去二太藍瓊纓谷柏道大宅「交人」食晚飯，作為birthdayboy嘅賭王身穿暗格西裝，打上紅色呔，精神奕奕，二房成員超瓊、超鳳一家、超蕸、超儀、猷龍等五個仔女，加埋女婿、媳婦同孫女，一屋自己人吃晚飯。女婿陳子聰同超儀姍姍來遲，不過呢個女婿好有心，買定生日蛋糕賀外父。