噚日係電盈（008）運動同樂日，主角二少李澤楷連續兩年noshow，舊年就話要搞賣盤單刁，今年唔通要度橋「再度反擊」城市電訊王維基？
一年人事幾番新，舊年擔大旗嘅JackSo，今年換上艾維朗，不過，艾維朗好醒目，上台致辭頭一句就話「同樂日參加者越嚟越多，即係代表公司發展越嚟越快」，再嚟多句「nowTV已經係城中No.1」。
起碼有一個月花紅
艾維朗話電盈叠馬唔係齋噏，入場儀式基本上係「晒馬」，高潮位係各部門表演，不過就似賣廣告多啲，好似ConsumerGroup同Television&Content兩team人，將8號仔所有過人之處（即係now寬頻電視、moov、eye）變成吹氣公仔。
電盈今年成績咁好，唔知會加幾多人工或者分幾多個月花紅呢？艾維朗話，每年都會檢討員工薪酬，基本上都有一個月花紅，假若達標，應該會多過一個月㖭。咁佢自己嗰份又點？艾維朗笑笑口話，自己對員工好，希望老細都對佢好喎！
股價一次低過一次
講開「再度反擊」城電，艾維朗語帶諷刺話，8號仔25年前已經有光纖，𠵱家嘅寬頻亦都唔係用固網電話線，強調自家嘅光纖足以圍繞地球26轉，要怪就怪「我哋係電盈」，喺大眾心目中，度度都會用到電盈網絡，所以要等到「時機成熟、光纖入屋兼serve到全港市民」先可以對外公佈。
講番二少noshow，自從佢鯨吞電盈後，華華記得佢出席過3次電盈運動日，上一次係05年，華華諗番起，都彷彿係噚日嘅事，因為當時電盈嘅股價同家陣差唔多，都係得4蚊左右。至於再數前啲，二少第一次出席係00年時，當時電盈股價都有廿幾蚊。第二次係02年，嗰時電盈股價5.55蚊，由10月頭低位反彈22%，但全年仍跌近五成。今次電盈運動日唔見二少，唔知係咪同公司股價有關？上個禮拜四，電盈股價跌到落全年低位，報4.58蚊，比9月尾高位，跌近11%。巧合係，二少舊年唔出席運動日，當時公司股價亦由高位跌近一成。
mailto:[email protected]