天氣開始轉凉，遲啲仲會凍好多㖭，呢個時候最好就係夜晚冲個熱水凉，然後亁亁淨淨咁跳上床，喺暖暖嘅被窩瞓覺。不過，正當大家瞓得高高興興嘅時候，有個計時炸彈可能隨時會爆炸，呢個就係啱啱陪你冲凉嘅──sorry，唔係你男友或女友，而係個熱水爐。
消委會老友叫我提醒吓各位blog友，有一種好普遍嘅花灑式電熱水爐，個爐只係連接花灑喉，唔連接浴缸；花灑除咗出水，仲負責幫助散熱，因為熱爐水太熱，出現壓力嘅時候，壓力會由連接嘅花灑口排出。但佢話，有人將呢類熱水爐，連接有開關手掣嘅花灑，而當個開關手掣關閉時，熱水爐就唔可以透過花灑排壓，谷埋谷埋有可能隨時爆，而且真係發生過呢類意外。所以佢話應該揀一啲冇開關手掣嘅花灑喉：「其實個爐已經有開關掣啦，唔使多此一舉。」
講開又講，天氣轉凉，最重要其實係身邊有個人肉暖包，可惜……（唉，雖然早前已經去到談婚論嫁階段，但……咁又點吖？）
逢周一至周四刊出