除咗小小超冇出席電盈嘅運動日，今年李家上下都noshow，冇出席旗下集團嘅運動日，好似對上一個星期六（11月17日）係和黃運動同樂日，一向風雨不改關心員工嘅超人李嘉誠就冇現身，連大班霍建寧都缺席。
不過咁，每年嘅和黃運動同樂日，都喺火炭香港體育學院舉行，由於體院要讓出嚟作為北京奧運嘅馬術賽場地，所以今年嘅和黃運動同樂日移師咗去海洋公園，仲由以前嘅「日場」，轉咗做「夜場」。以前每年嘅和黃運動日，記者行家都要晨咁早撲入去火炭等李生，今年大家就慳番，試問早睡早起去打golf嘅超人李，點會夜麻麻走去海洋公園？
其實，超人一向好重視呢個一年一度同員工接觸嘅機會，好似98年嗰時，佢就帶埋個寶貝孫女出席。
另外，2000年舉行嘅和黃運動同樂日，撞正滂沱大雨兼氣溫驟降，當時超人同記者講：「我知道有好多間香港公司本嚟都喺今日搞運動會，但因為天氣欠佳取消，不過，和黃運動日如常舉行，這種不怕艱難嘅精神，就係我成日講嘅『和黃精神』。」至於今年，超人缺席，唔知係咪因為驚第日打波冇精神呢呵！