早幾年出道嘅姊妹「易字頭」，當年勝在青春無敵，有一段時期都叫曝光率高，不過當佢哋做得兩三年，乜新鮮感都冇晒，加上娛樂圈新人一浪接一浪，高矮肥瘦樣樣齊，冇番咁上下實力嘅都好難留低，佢兩姊妹繼俾唱片公司放逐後，早前簽咗一間內地經理人公司，以為可以再大展拳腳，點知個幕後大老細係空心老倌，最近仲走埋佬㖭，搞到𠵱家兩姊妹無處容身。
「易細妹」生得精靈可愛，做戲又唔差，𠵱家間唔中都拍吓戲，但「易家姐」就弊嘞，完全零工作，不過有人仲以為自己係一線藝人，接job時嫌自己價低，仲同人講：「我唔止去到咁嘅價。」但又唔諗吓𠵱家有job接都係靠掹細妹衫尾，再咁搞落去，連累埋個妹，到時兩姊妹就冇機會喺娛樂圈生存喇！
Textby關仁