商務及經濟發展局局長馬時亨做咗局長幾年嚟，每年都會同媽打，即係民政事務局前常秘李麗娟，帶住班沙士孤雛周圍去；之前去過海洋公園，今次梗係要去返廸士尼樂園戥番勻，所以肥馬同媽打噚日就帶咗近30個沙士家庭成員一齊去廸士尼玩咗一日。但可惜媽打趕住去北京，否則就可以同班小朋友一齊睇埋煙花至散band。
肥馬局長話見到啲小朋友幾年間大得咁快好感動，最開心係佢哋可以過健康嘅新生活。既然山長水遠入到廸士尼，肥馬都唔好嘥，應廸士尼邀請順道喺樂園內視察一吓，特別要睇睇佢哋新嘅遊戲搞成點。咁又係嘅，香港廸士尼業績麻麻，政府都應該昅實啲。