據「路邊社」消息，和黃唔係包咗成個海洋公園請員工玩番日，只係包咗海洋公園嗰日嘅nightpass，再以優惠價賣畀員工，等各位和黃成員可以帶埋屋企人去海洋公園。
其實，近幾年唔少大公司為咗增加員工歸屬感，都好鍾意包主題公園嚟搞活動，好似滙豐（005）、地鐵（066）咁，都先後包過海洋公園，免費招呼員工同屋企人。
華華問過海洋公園，佢哋話包場基本價係29.7萬銀，至少要1500人以上，每人包一個簡單餐盒，即係一個人大概198蚊，包場時間由黃昏6點後，因為日場嘅客走得七七八八，唔會有太多閒雜人。
至於另一主題公園廸士尼，包場唔係唔得，但要晚黑8點過後先有得傾，等佢哋放埋煙花至得，而且一定要超過800人，唔係場面會太過冷清喎。
啱啱過咗個禮拜六，星展銀行就包起海洋公園，以超筍價益員工同埋家屬，大人同小朋友分別只係畀75蚊同55蚊，比原價分別平六成同五成。華華聽星展公關講，今次活動使咗超過40萬銀。