許冠傑（Sam）噚日喺屯門市廣場舉行《人生多麼好》MV首播會，吸引近千名市民圍觀，有數十位fans着豹紋服飾撐場。阿Sam不時向fans揮手，其後佢由五名保安護駕，到台下同fans影大合照。
活動舉行期間，司儀邀請咗五位fans上台唱歌，阿Sam一邊聽一邊和唱，又經常拍歌迷嘅膊頭以示鼓勵。最後阿Sam逐一錫錫呢五位fans，仲同兩個男歌迷咀嘴，引嚟台下一眾女fans尖叫。之後有幾名代表上台送禮物，阿Sam又再次錫錫佢哋。
東東出場鳥獸散
由於阿Sam只係逗留25分鐘就離開，有一位女fans為咗送封信畀偶像，一度想衝上台，即時俾保安人員阻止。另外，有份出席嘅陳曉東緊接住阿Sam表演，點知阿Sam一走，在場fans即刻鳥獸散，剩番好多空位，不過東東話一啲都唔覺得尷尬。此外，阿Sam下月17號舉行嘅演唱會，將會設有大型道具同現場觀眾玩遊戲，又會安裝兩個大螢幕播放現場情況，等全場觀眾可以一齊大合唱。
