傅穎─開心果笑聲存
「最想肥姐（沈殿霞）長命百歲，因為肥姐一直都帶歡樂畀每一個家庭，我細細個就睇《歡樂今宵》，對佢做主持印象特別深，我諗所有香港人都同我一樣，希望繼續見到肥姐演出，不過其實我都好希望有好多藝人都有100歲命，好似周星馳咁，如果佢長命百歲，就可以繼續搞笑，同樣可以帶到歡笑畀人。」
劉心悠─自盼五代同堂
「我希望自己可以活到100歲，希望自己長命啲都唔係好自私啫。活到100歲嘅時候，人生經驗同閱歷一定好豐富，對人或處事都會有唔同睇法。
生命本身就係畀到好大希望foreverything，到時我估自己都應該有仔有孫，希望可以見到自己四、五代同堂啦。」
梁詠琪─華仔破硬紀錄
「我會揀劉德華，因為佢真係好有energy，而且佢好勤力，好鍾意工作，亦都做得好投入。𠵱家佢拍咗百幾齣電影，我相信如果佢有100歲，就起碼拍過300部戲，到時真係打破世界紀錄，最主要華仔畀人感覺到係精力充沛，好似有用不完嘅精力，就算佢到100歲都一定會咁好精神啦。」
徐子珊─肥姐鬥志可嘉
「我會希望係沈殿霞（肥姐），因為喺台慶頒獎禮當晚，見肥姐好努力喺台上同大家度過呢個盛會，令到我都好感動。
雖然大家當晚見到肥姐時都好悲傷，但知道佢好有鬥志，大家都會為佢打氣支持，希望肥姐可以盡快康復，繼續同大家一齊喺幕前參與演藝事業，延續呢份精神。」
採訪：魯萍、卓美娟、駱華齡、卓寶花
