要喺一行做60年真係唔易，人稱「播音皇帝」嘅鍾偉明就係其中一人。多位廣播界同演藝界嘅猛人，包括鄒文懷、杜國威、廣播界前輩李我同廣播處前處長張敏儀等，日前齊齊出席鍾大哥投身廣播界60周年慶祝會，仲送上禮物表揚呢棵廣播界長青樹。
李我親筆題咗對賀聯，寫住「偉明從藝逢甲子松柏長春耀香江」；署理廣播處處長傅小慧就送咗套收錄咗鍾大哥曾參與嘅電影《離巢燕》同《傳媒春秋》訪問片段，𠱁得鍾大哥好開心。
鍾大哥以咬字清楚見稱，發音字正腔圓，係唔少滿口懶音嘅後輩嘅學習典範。佢把聲陪伴港人60年，先後喺麗的呼聲、美國新聞處同港台任職，參與多個膾炙人口嘅廣播劇，其中《韋倫探案》同做咗長達25年嘅港台長者節目《松柏之聲》，更係代表作。