黃宗澤（Bosco）與佘詩曼分別奪得新城勁爆兒歌男、女歌手獎，二人雖然在無綫頒獎禮上食白果，不過在兒歌樂壇中得到大獎，總算有所安慰。而黃宗澤與胡杏兒這對緋聞情侶，早前被指私竇夜會，二人都表示只為監製慶祝生日，黃宗澤更指二人是最佳的搵錢拍檔。
黃宗澤、胡杏兒、鍾嘉欣、佘詩曼及Hotcha等昨日出席在小西灣舉行的《新城勁爆兒歌頒獎禮2007》，今年的兒歌大部份由電視藝員主唱，歌手略嫌遜色，只有裕美、吳彤與Hotcha得獎，黃宗澤奪得新城勁爆兒歌男歌手獎，女歌手獎由佘詩曼奪得。
情侶檔搵真銀
黃宗澤與胡杏兒這對緋聞情侶雖然前後腳到場，不過被要求合照時都落落大方，早前二人被拍到在私竇夜會消夜，黃宗澤解釋：「嗰日其實仲有好多人在場，好似鄭嘉穎、陳國邦同羅敏莊等，因為有個監製生日，所以一齊慶祝啫。」談到二人在好友圈中已是公開的一對，他打趣說：「唔係，我係同鄭嘉穎一對嘅。」
對於二人的緋聞，公司非常受落，又不時安排二人情侶檔工作，二人應該感到非常開心，黃宗澤說：「都係搵錢拍檔啫，大家鍾意咪好囉。」二人豈不是對方的搖錢樹？他說：「唔係，我係我阿媽嘅搖錢樹啫，佢（指杏兒）賺到錢又唔係畀我，我賺到嘅錢都係畀晒我阿媽啫。」
與廖碧兒齊獲合唱歌曲獎的杏兒到場時，被記者取笑經常與黃宗澤消夜，杏兒不避嫌問黃宗澤：「吓！乜（指段新聞）出咗咩？」杏兒說：「其實嗰日係鄭嘉穎發起消夜嘅，都係食餐飯，好少事啫，冇乜嘢。」
為裸男畫彩繪
此外，廖碧兒昨日在圓方出席《聖誕奇圓》揭幕活動，廖碧兒更親手為男模特兒畫上人體彩繪，廖碧兒表示自己怕冷，所以沒有勇氣擔任人體彩繪模特兒，她又透露今個聖誕節可以與家人在港一齊慶祝，她說：「家姐同細佬都會返嚟香港，可以一家五口一齊過聖誕，真係好開心。」
至於前日推出首張大碟《愛在記憶中找你》的林峯，前晚專程到銅鑼灣舉行簽名會，有內地、台灣和日本fans前來捧場，有fans更大手購買近20隻碟，林峯說：「我都有買，會送一隻畀身邊朋友，因為隻碟有三個封面，另外兩隻叫佢哋自己買，迷你演唱會就籌備緊，有好多細節要傾。」
採訪：胡比、卓美娟
攝影：陳偉權
《新城勁爆兒歌頒獎禮2007》部份得獎名單
得獎項目：勁爆年度兒歌大獎
歌手/歌曲：佘詩曼《星星的加冕》
得獎項目：勁爆兒歌男歌手
歌手/歌曲：黃宗澤
得獎項目：勁爆兒歌女歌手
歌手/歌曲：佘詩曼
得獎項目：勁爆兒歌創作大獎
歌手/歌曲：李紫昕
得獎項目：勁爆合唱兒歌大獎
歌手/歌曲：胡杏兒、廖碧兒《朱古力與雲尼拿》
得獎項目：勁爆最受歡迎親子兒歌大獎
歌手/歌曲：湯盈盈《Wearefamily》
資料來源：新城電台
