上個禮拜六，鄭裕彤長孫、被視為新世界（017）接班人嘅鄭志剛，接受《中國經營報》訪問。睇完個訪問，你就知點解彤叔咁錫呢粒孫。
鄭志剛喺美國哈佛大學畢業，主修嘅並唔係工商管理，而係較冷門嘅東亞文學，點解？原因好簡單，佢都有個做生意咁叻嘅阿爺喺度咯，仲使乜讀工商管理，鄭志剛話：「企業管理可以從爺爺爸爸裏學習，不覺得有太大難度」。
但喺哈佛有咁多科好揀，點解揀東亞文學呢？佢答：「因為知道以後會管理家族事業，而人文修養對於個人成長，有很重要意義，透過這科可以體會人文內涵，領悟所生存的社會，這些都係一個合格的企業管理者必備的素質。」聽落係咪好深奧呢！鄭志剛不愧為第三代接班人，諗嘢係唔同嘅。
想提高歌劇造詣
講到影響鄭志剛最深嘅人，就梗係彤叔同純官。另外，鄭志剛又講到有一句說話對佢影響好大，「人的一生應該是問心無愧、無怨無悔的一生。當回憶往事的時候，能夠不因虛度年華而悔恨，不因碌碌無為而羞恥，而且還希望同樣的人生可以重新來過。」
不過，鄭志剛冇提過呢句話嘅出處。
咁如果有時間，佢最想做啲乜？佢話會去意大利深造歌劇喎，原來鄭志剛好鍾意歌劇，嗱，佢話晒係新一代鑽石王老五，各位女士塞錢落你袋喇！