有一個好鍾意計數嘅朋友，曾經問過敏妮一個問題：「有冇計過你一生可以賺幾多錢？」唔好誤會，敏妮呢個朋友唔係做保險，亦唔喺稅局做，只係非常鍾意計數，遇到任何嘢要判斷嘅時候，佢都會睇吓可唔可以將佢「量化」，先至做選擇。
敏妮聽到呢條問題，有啲感觸，人嘅生命本應無價，但問心嗰句，李兆基個孫，同敏妮阿爺個孫（即係敏妮），喺一般人眼中應該唔同「價」！
每個人都唔同價
講番一生可以賺幾多錢呢個問題，假設22歲大學畢業，出嚟搵到份萬五蚊嘅工，每年加薪5%；後生仔好少一份工做到尾，如果40歲之前，每3年轉一次工，每次轉工都有一成薪金升幅，直至40歲後修心養性，諗住做到退休。
敏妮將呢個模擬情況用excel做咗出嚟，發現好多有趣嘅嘢。
假設你真係有呢個模擬情況咁理想，齋計你搵到幾多，到65歲時可以累積到差唔多2200萬銀。開心？咪咁早！呢個淨係計收入，冇計到支出。
記住保持競爭力
仲有，按呢個模擬情況，薪水會隨住年資而有增冇減，某個年齡，薪金會去到一個「貴」嘅水平。敏妮唔敢睇小任何人嘅能力，只係想提醒各位打工仔，當經驗同埋資歷隨住年齡上升嘅同時，薪酬亦會隨住年資增加而不斷提升，同時個人體力就會隨年齡下跌，簡單啲講，幾十歲人賣嘅係識見同閱歷，到時就要問吓自己，個人識見值唔值人哋用一個「貴」嘅價錢去買？香港始終係商業社會，所以敏妮經常睇吓份人工，提醒自己保持競爭力。
http://manlitalk.com/blogs/