曾經在數碼港取景拍戲，讚嘆過其用料上乘，室內設計線條簡單、HighTech，室外富空間感，有天有水，冷與熱調合諧和，誠一流高質素建築，不似內地一些掩眼法商廈，外形科幻如光子力研究所，內裏卻如淡水爛尾樓，水喉漏水兼電線外露。數碼港戲院也正斗，聲畫靚，觀眾群有水平，故此經常幫襯。
前幾天晚上十時許要到數碼港內某電腦特視中心看電影試片，出發前已向同事詢問了清楚地址及應該將車停泊在那一個停車場，同事問是否需要地圖，當時心想，數碼港啫，又唔係未去過，路在口邊，唔信搵唔到，哈，點知真係搵唔到。
十時過後的數碼港，戲院已關門，兜了幾個圈，一個路人也找不着，奇就奇在連管理員、護衞員也找不到一個，找不到人問路便靠自己找吧，數碼港標榜高科技，但路牌卻連照明系統也欠奉，得把車駕到路牌前用車頭燈照明，結果兜來兜去搵唔到，唯有用LowTech方法，致電同事求救，原來目的地就在面前。
忘記了曾閱讀的是數碼港還是貝沙灣的小冊子，其中一項設施是廿四小時服務的郵局，方便網上Bid完心頭好可盡快收到，當天設想得如此周到，今天怎會連路牌照明也慳得就慳？
繼愉景灣本來是用作發展哥爾夫球場但變成萬千居民安樂之所後，數碼港挾雷霆萬鈞高科技之勢演變成背山面海高增值優皮士城中置業之選，按這條路看，應密切留意西九之發展，劇院及乜乜館物物館都只係包裝花紙，住宅物業才是正主兒，有排炒，應該買得過。