上周四朝早在茶餐廳食早餐，店主一邊看電視新聞，一邊嘀嘀咕咕慨嘆明年歐國盃決賽周時，要少了許多生意。
英格蘭主場輸畀克羅地亞，除了令許多信心十足捧和局的人，受到即時損傷外，它繼後引發的慘情，更有如美國次按風暴，全球許多經濟活動都要受到影響。睇波場所如餐廳、酒吧，體育用品製造商，如意算盤要從新計數，最頭痛者應是英國的賭波公司，少了自己的國家隊參戰，投注意欲起碼降低3、4成呢。
千夫所指的麥卡倫，則展示了最「務實」的能屈能伸策略，莫說如今輸波出局，就算英格蘭能夠好彩出線，佢個帥位都未必坐得穩。明知炒硬魷魚，點解只係現身口講承受責任，卻死都唔肯請辭呢？
死賴不走，尊嚴安在？其實，包容一點設身處地諗諗，畀你都會咁做。這份做咗15個月嘅工，乏善足陳更劣評如潮，東家唔打之後，恐怕也沒有西家會開歡迎之門，失業幾已等於退休，麥卡倫只46歲，以後生計怎麼好？當然都係等炒好過，拿了5百幾萬美金解約賠償，逍遙世外過埋下半世更實際。
文：張美德
mailto:[email protected]