仲有一個禮拜，就係立法會港島區補選投票日。選情進入倒數埋牙階段，噚晚由八間電子傳媒合辦嘅補選論壇係選前最後一次公開辯論，自然充滿針鋒相對嘅場面。兩位阿太依然係焦點所在，葉劉喺開場白中，已經衝住陳太而嚟，佢話：「民主冇專利，良心人人有。」即係話唔係陳太先係「香港良心」、淨係陳太先支持民主啦。
八方聽到葉劉咁講，差啲為佢抹一把汗，幾驚佢重蹈覆轍，話其實當年希特拉都有良心。查實良心呢樣嘢，真係未必人人都有，唔通葉太冇聽過「埋沒良心」呢家嘢？
A貨民主有樣睇
至於民主，雖然冇話好似LV、Gucci等名牌咁有版權有專利，人人都可以支持可以爭取，但亦都真係有真有假㗎喎。不過，有啲假到出晒面，一睇就知係假嘢；一啲就假得嚟好似真嘅一樣，要花啲心思同有啲經驗，先知係A貨。
老實講，兩個鐘頭嘅辯論唔算好精采，但就有唔少騎呢笑位。好似強調自己係大狀嘅候選人李永健咁，係唯一單拖上台拉票嘅候選人，佢喺記者提問時段俾問到佢知唔知《基本法》158條同159條嘅內容講乜，呢兩條其實係講《基本法》嘅解釋權同修改權，但李永健就直認冇睇過，因為之前掛住刨2006年嘅香港年鑑，誰不知記者會問《基本法》。咁都得，你估𠵱家會考貼題目咩？
蕭思江跳飯碗舞
另一候選人蕭思江就跳「飯碗必勝舞」，佢嘅助選團成員向台嘅四方行前一步，然後舉起飯碗，話志在四方，食極都有喎，真係好有無厘頭風格。反而何來嘅狀態就好番啲，好似有網友提問如何加強虐畜執法，一向保護開大嶼山啲牛嘅佢答得好詳盡，陳太對呢個議題就明顯唔熟，答到口窒窒。
完場前，各候選人輪流總結，葉太居然玩憑歌寄意，選播米高積遜嘅舊歌"Onedayinyourlife"，話呢首歌代表咗當年佢因為推23條，失去咗市民對佢嘅愛同信任嘅心聲，但只要大家需要佢，佢就會返嚟。不過八方覺得葉劉揀錯歌，雖然歌詞有話"Justcallmyname,andI'llbethere"，但亦有句話"Thoughyoudon'tneedmenow,Iwillstayinyourheart"，咁咪即係話暫時香港人唔需要你住？